Uzbekistan Airways’ни хусусийлаштириш ишлари бошланяпти

Uzbekistan Airways’ни хусусийлаштириш ишлари бошланяпти. Бу президент фармони билан тасдиқланган.

Ҳужжатга мувофиқ, 2022 йил 1 сентябрга қадар компаниянинг 51 фоиз ва ундан юқори миқдордаги давлат улушини савдога чиқариш ишлари бошланиши керак. Акциялар, шу жумладан, оммавий жойлаштириш (IPO) орқали сотилади.

«Ҳозир мавриди эмас»

Uzbekistan Airways — собиқ «Ўзбекистон ҳаво йўллари»нинг бир қисми. Бу миллий авиакомпания бўлиб, ҳозирда 100 фоиз давлатга тегишли.

2021 йилда ҳукумат компанияни сотишга тайёрлиги, бироқ ҳозирча бунинг мавриди келмагани ҳақида хабар берилган эди.

Миллий авиакомпанияни сотиш борасида тўхталадиган бўлсак, бу борада режаларимиз бор, бироқ яқин келажакда эмас. Чунки у ҳозирда хорижий инвесторларни етарлича жалб этмайди. Қарзлар масаласи ҳал этилгач ва қулай шароит яратилгач, бу масалага, албатта, қайтамиз, — деган эди транспорт вазири ва Uzbekistan Airways бошқарув раиси Илҳом Маҳкамов.

Аввалроқ Uzbekistan Airways ва яна 14 компания IPO ўтказиладиган компаниялар рўйхатига киритилгани ҳақида хабар берилган эди.