«ПСЖ» Мбаппега икки мавсум учун 150 млн евро маош ваъда қилмоқда. «Реал» йилига 30 млн таклиф қилган эди

Килиан Мбаппе «ПСЖ» ёки «Реал»дан бирини танлайди.

Журналист Гильем Балагенинг ёзишича, парижликлар 23 ёшли футболчига икки мавсум учун 150 миллион евро маош тўлашга тайёр. Воқеалар фонида Мбаппе «Реал» ўз таклифини оширишини истамоқда. Мадрид клуби унга йилига 30 миллион евро таклиф қилган.

Мбаппе учун ҳамон «қаймоқранглилар» сафига ўтиш афзалроқ вариант бўлиб турибди. Француз учун курашда фақатгина «ПСЖ» ва «Реал» иштирок этмоқда.

«ПСЖ» бош мураббийлигига Зинедин Зидан асосий номзод бўлиб турибди. Раҳбарият Зиданнинг келиши Килиан Мбаппенинг жамоада қолишига сабаблардан бири бўлиши мумкинлигига ишонмоқда, деб ёзади журналист Фабрис Ҳокинс.

23 ёшли Мбаппенинг «ПСЖ» билан шартномаси 2022 йил ёзида ўз ниҳоясига етади. Аввалроқ француз ОАВ Килиан «ПСЖ»да қолишга қарор қилгани ва бу ҳақда май ойида эълон қилиниши ҳақида хабар қилганди.

Килиан 2021/22 йилги мавсум «ПСЖ» сафида барча мусобақаларда 38 та ўйинда иштирок этиб, 28 та гол ва 17 та голли узатмага муаллифлик қилди.