Футбол бўйича Европа Конференциялар Лигасининг 1/4 финал босқичи дастлабки ўйинида «Рома» 7 апрель, пайшанба куни «Будё-Глимт» билан баҳс юритди.
Норвегияда кечган баҳсда мезбонларнинг қўли баланд келди. Дастлаб Лоренцо Пеллегрини биринчи бўлим якунланиши арафасида «Рома»нинг комбинациясини голга айлантириб, меҳмонларни ҳисобда олдинга олиб чиқди. 56-дақиқага келиб, Брис Вембангомо мувозанатни тиклашга муваффақ бўлди. Ушбу вазиятда римликлар дарвозабони Руй Патрисиунинг ишончсиз ҳаракат қилганини қўшимча қилиш мумкин. Асосий вақт тугашига бир дақиқа қолганида эса Уго Ветлесен жаримадан оширилган тўпни боши билан дарвозага жойлаб, «Будё-Глимт»нинг ғалабасини таъминлади.
Шу тариқа «Рома» сафарда кечган баҳсда аламли мағлубиятга учради. Жамоанинг ўзбекистонлик ҳужумчиси Элдор Шомуродов учрашувнинг 65-дақиқасида захирадан ўйинга қўшилди.
Қайд этиб ўтиш керак, римликлар ушбу жамоа билан бир гуруҳдан ўрин олганди. Жозе Моуриньо шогирдлари битта ўйинда мағлубиятга учраган (6:1) бўлса, яна бир ўйинда дуранг (2:2) натижа қайд этилган. Томонларнинг жавоб беллашуви 14 апрель санасига белгиланган.
Конференциялар Лигаси
1/4 финал, дастлабки баҳслар
7 апрель, пайшанба
«Будё-Глимт» Норвегия – «Рома» Италия 2:1
Голлар: 0:1 – 43 Пеллегрини, 1:1 – 56 Вембангомо, 2:1 – 89 Ветлесен.«Будё-Глимт»: Хайкин, Сампстед, Ҳойбротен, Моэ (Квиле, 90), Вембангомо, Салтнес, Ветлесен, Ҳаген, Кумсон (Мвука, 82), Эспеёрд (Бонифасе, 77), Пеллегрино.
«Рома»: Руй Патрисиу, Карсдорп, Манчини (Смоллинг, 69), Кумбула, Рожер, Залевски (Виня, 65), Мхитарян (Шомуродов, 65), Сержиу Оливейра, Кристанте, Пеллегрини, Абраҳам.
Огоҳлантиришлар: Кристанте (18), Виня (88).
Изоҳ (0)