Наманганда қайнота ўғлининг қарзини тўлаш учун келини номига 2 млрд сўм кредит олгани аниқланди

Наманган шаҳрида 2 миллиард сўм кредит маблағларини талон-торож қилган шахсга нисбатан жиноят иши қўзғатилди, деб хабар беради Бош прокуратура ҳузуридаги департамент.

Маълум қилинишича, департаментнинг Наманган шаҳар бўлими томонидан «Микрокредитбанк» АТБ Наманган филиалининг мурожаатига асосан терговга қадар текширув ўтказилган. Текширув давомида «С-И.С.» хусусий корхонаси таъсисчиси бўлган фуқаро А.И. ўғли А.нинг қарзларини қоплаш мақсадида келини Г.ни корхона раҳбарлигига тайинлагани аниқланган. Ушбу шахс корхона номига банк филиалидан паррандачилик фаолиятини ташкил этиш учун ажратилган 2 миллиард сўм кредит эвазига сотиб олинган мулкларни сотиб юбориб, кредит маблағини талон-торож қилган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкент вилоятида 2,6 млрд сўм кредит маблағларини талон-торож қилган банк ходими ушлангани, Наманганда фуқароларга ажратилган 223,5 млн сўм имтиёзли кредитни қўлга киритган шахс аниқлангани тўғрисида хабар берилганди.