Россия Либерал-демократик партияси етакчиси Владимир Жириновский 75 ёшида вафот этди. Бу ҳақда Давлат Думаси спикери Вячеслав Володин ўзининг Telegram-каналида маълум қилди.
«Оғир ва узоқ давом этган хасталикдан сўнг Владимир Вольфович Жириновский оламдан ўтди... Барчамиз учун бу қайтариб бўлмайдиган йўқотиш. Унинг ёрқин хотираси қалбимизда абадий қолсин», — дейилади хабарда.
Спикер Давлат Думаси йиғилишида ҳам Либерал-демократик партия етакчисининг вафоти ҳақида маълум қилиб, бир дақиқалик сукут эълон қилди. Партиянинг Думадаги фракцияси Жириновскийнинг вафотини тасдиқлади.
Владимир Жириновский 2 февраль куни коронавирус билан Москвадаги президент ишлари бошқармасининг марказий клиник шифохонасига ётқизилганди.
25 март куни Маш телеграм канали ва сенатор Александр Пронюшкин Жириновскийнинг ўлими ҳақида хабар берди. Аммо кўп ўтмай Володин ва Либерал-демократик партия бу маълумотни рад этди. Пронюшкин сиёсатчининг вафоти ҳақидаги постини ўчириб ташлади ва узр сўради. Володин унга истеъфога чиқишни маслаҳат берди. Кремль Жириновскийнинг ўлими ҳақидаги март ойида тарқалган хабарларни фейк деб атаган ҳамда сиёсатчининг аҳволи оғирлиги ва шифокорлар назоратида эканини айтган. Либерал-демократик партия эса ўшанда Жириновскийнинг ўлими ҳақида хабар тарқатганларни судга бериш билан таҳдид қилган.
Маълумот учун Владимир Жириновский 1946 йил 25 апрелда Қозоғистон ССР (ҳозирги Қозоғистон Республикаси) Олмаота шаҳрида туғилганди. 1970 йилда Ломоносов номидаги Москва давлат университети қошидаги Шарқ тиллари институтининг тарих ва филология факультетини «Туркия ва турк тили» мутахассислиги бўйича имтиёзли диплом билан тамомлаган. 1977 йилда Москва давлат университетининг юридик факультетини имтиёзли диплом билан тугатган.
Жириновский олти марта Россия президентлигига номзодини қўйган. У ўзининг энг яхши натижасини 2008 йилги сайловларда қўлга киритган — ўшанда Дмитрий Медведев (70,28 фоиз) ва Геннадий Зюгановдан (17,72 фоиз) кейин учинчи (9,35 фоиз) ўринни эгаллаган.
Сиёсатчи «Ватан олдидаги хизматлари учун» ордени соҳиби бўлган, шунингдек, «Шон-шараф», Александр Невский ордени ҳамда II ва I даражали П. А. Столйпин медаллари билан тақдирланган.
Изоҳ (0)