Жаҳон олтин кенгашининг сўнгги ҳисоботига кўра, февраль ойида энг кўп олтинни Ўзбекистон сотган. Қозоғистон январь ойида 17 тонна олтин сотганидан кейин февраль ойида яна 5 тонна сотди.
Бундан ташқари февраль ойида Қатар 6 тонна, Мўғулистон ва Германия бир тоннадан олтин сотган.
Аввалроқ февраль ойида Ўзбекистон олтин экспортини кескин оширгани ҳақида маълум қилинган эди.
Январь ойида 587 млн долларлик олтин сотилган бўлса, бу кўрсаткич февраль ойида 1,7 млрд долларни ташкил қилган. Олтин бошқа товарлар сотуви пасайиб кетиши сабаб 57 фоиз улуш билан Ўзбекистонинг асосий экспорт товарига айланди.
Февраль ойида Ўзбекистон олтин заҳиралари 22 тоннага камайиб, 339 тоннага тушган. Бу 2020 йил декабрь ойидан бери энг паст кўрсаткичдир.
Бироқ қимматбаҳо металлар Ўзбекистон учун ҳали ҳам Марказий банк захираларининг муҳим қисмини ташкил этади.
Fitch таҳлилчиларининг фикрига кўра, олтин сотуви Ўзбекистон иқтисодиётига бўлган зарарларни камайтиради.
Ўзбекистон олтинини ким ва қаерга сотяпти?
Кўплаб олтин ишлаб чиқарувчи мамлакатларда уни мамлакатнинг ўзи экспорт қилади, аммо Ўзбекистондаги ягона сотувчи – бу Марказий банк бўлиб, ишлаб чиқарувчилардан (масалан, Навоий кон-металлургия комбинатидан) олтинни сотиб олади ва уни бошқа мамлакатларга (асосан Швейцарияга) экспорт қилади.
Марказий банкнинг маълум қилишича, олтин унинг нархи қимматлашган пайтида сотилади. Февраль ойи эса мақбул пайт бўлди — олтин баҳоси бир унция учун 1804 доллардан 1913 долларга ошди.
Изоҳ (0)