БМТ: Украинада уруш бошланганидан бери 1480 нафар тинч аҳоли ҳалок бўлди

Россия томонидан Украинада ҳарбий операция бошланганидан бери 1480 нафар тинч аҳоли ҳалок бўлган, шунингдек, 2195 киши яраланган. Бу ҳақда БМТнинг инсон ҳуқуқлари бўйича олий комиссари бошқармаси маълум қилди. Таъкидланишича, гап фақатгина тасдиқланган ҳолатлар ҳақида кетмоқда, ҳақиқий рақамлар бундан кўп бўлиши мумкин.

Ўлдирилган 1480 фуқаронинг 331 нафари эркак, 211 нафари аёл, 22 нафар қиз ва 40 нафар йигит, шунингдек, 61 нафар болалар ва 815 нафари жинси ҳозирча аниқланмаган катта ёшли инсонлардир. Яраланганларнинг 253 нафари эркак, 194 нафари аёл, 43 нафар қиз ва 40 нафар йигит, шунингдек, 100 нафар бола ва 1565 нафари жинси ҳозирча аниқланмаган катта ёшли инсонлардир.

Донецк ва Луганск вилоятларида жами 474 киши ҳалок бўлган, 1065 киши яраланган. Киев назорати остидаги ҳудудларда эса ушбу кўрсаткич мос равишда 407 ва 808 нафарни ташкил этмоқда. Донецк ва Луганск Халқ Республикалари ҳудудларида — 67 ва 257 нафар. Украинанинг қолган ҳудудларида 1006 нафар тинч аҳоли ҳалок бўлгани ва 1130 киши жароҳат олгани қайд этилган.

БМТнинг таъкидлашича, қайд этилган қурбонларнинг аксарияти катта майдонни яксон қилишга мўлжалланган портловчи қурилмалар, оғир артиллерия ва залп ўт очиш тизимлари, бундан ташқари, ракета ва авиация зарбалари ёрдамида амалга оширилган зарбалар оқибатида ҳалок бўлган.

Киев вилоятидаги Буча шаҳрида тинч аҳолининг қирғин қилингани 2 апрель куни, Россия ҳарбийлари чиқиб кетганидан кейин Украина армияси шаҳар устидан назорат ўрнатган пайтда маълум бўлди. Украина президенти маҳаллий аҳолининг ўлимида россиялик аскарларни айблади. Россия Мудофаа вазирлиги ҳалок бўлганларнинг видео ва суратларини «провокация» ва «Ғарб оммавий ахборот воситалари учун Киев режимининг томошаси» деб атади. Вазирлик маълумотларига кўра, рус ҳарбийлари 30 март куни шаҳарни тарк этгунга қадар Буча шаҳридаги бирорта ҳам маҳаллий аҳоли «ҳеч қандай зўравонлик ҳаракатларидан жабр кўрмаган».