Энергетика вазирлиги штаби томонидан 2022 йилнинг январь—март ойлари давомида истеъмолчиларнинг табиий газдан фойдаланиш ҳолатлари таҳлил қилинди, деб хабар беради вазирлик матбуот хизмати.
Ўтказилган тадбирлар давомида ўтган 3 ойда республика бўйича 765 та ҳолатда улуржи истеъмолчилар томонидан амалдаги қоидаларга риоя этмаган ҳолда 28 миллион 398 минг куб метр ҳажмдаги табиий газдан ноқонуний ва нооқилона фойдаланиш ҳолатлари аниқланган. Бунинг натижасида газ таъминоти корхоналари манфаатларига 25 миллиард 831 миллион сўм зарар етказилган.
Ушбу миқдордаги табиий газ 4 миллион хонадоннинг бир кунлик истеъмолини ташкил қилади.
Ноқонуний фойдаланиш ҳолатларининг энг кўпи — Фарғона, Тошкент, Жиззах, Бухоро ва Навоий вилоятларида аниқланган. Барча ҳолатлар бўйича тегишли ҳужжатлар расмийлаштирилиб ҳуқуқни муҳофаза қилувчи органларга тақдим этилган.
Эслатиб ўтамиз, Энергетика вазирлиги штаби томонидан март ойининг ўтган 15 куни давомида истеъмолчиларнинг табиий газдан фойдаланиш ҳолатлари таҳлил қилинганда уч вилоятда 7,6 миллиард сўмлик газ ўғирлангани аниқланганди. Ушбу ҳолатлар бўйича тегишли ҳужжатлар расмийлаштирилиб ҳуқуқни муҳофаза қилувчи органларга тақдим этилган.
Изоҳ (0)