«Ички ишлар органлари патруль-пост хизмати фаолиятига замонавий ахборот технологияларини жорий этиш тўғрисида»ги Вазирлар Маҳкамаси қарори лойиҳаси муҳокамага қўйилди.
Ҳужжат лойиҳасига кўра, 2023 йил 1 январдан бошлаб ички ишлар органларида босқичма-босқич «Э-патруль» тизими жорий этилиб, текшириш учун фуқарони ички ишлар бўлимига олиб бориш амалиётидан воз кечилади. Бунда барча маълумотлар жойида планшет орқали текширилиб, патруль-пост хизмати ходимлари фаолияти бодикамерадан фойдаланган ҳолда амалга оширилиши йўлга қўйилади.
Қуйидагилар Патруль-пост хизмати саф бўлинмалари ходимлари томонидан жамоат жойларида ҳуқуқбузарликлар содир этишда гумон қилинаётган фуқаролар ва бошқа шубҳали шахсларни электрон идентификация қилиш тартиби тўғрисидаги низом иловасига мувофиқ тасдиқланади:
- «Э-патруль» тизимидан фойдаланиш тартиби;
- Патруль-пост хизмати ходимлари ҳаракатларини қайд этувчи техник воситалардан фойдаланиш тартиби;
- Бодикамералар орқали қайд этилган маълумотларни ҳисобга олиш ва сақлаш тартиби;
- «Э-патруль» тизимидан фойдаланишда ходимнинг мажбуриятлари.
- планшет орқали шахсни биометрик идентификация қилишда фойдаланиладиган «Э-патруль» дастурий комплексининг техник топшириғи, дастурий таъминоти ва мобил иловасини ишлаб чиқсин ҳамда техник топшириқни «Киберхавфсизлик маркази» давлат унитар корхонасида давлат стандартларида ўрнатилган талаблар бўйича экспертизадан ўтказилишини, унинг асосида ишлаб чиқилган ахборот тизимини ишга туширишдан аввал тизимни техник топшириқ ва ахборот хавфсизлиги талабларига мослиги юзасидан экспертизадан ўтказилишини, дастурий таъминот ва мобил илованинг жорий этилгунга қадар сертификатлашини таъминлайди.
Шунингдек, бир ой муддатда «Э-патруль» тизимининг ахборот ва киберхавфсизлигини таъминлаш ҳамда техникаларига доимий хизмат кўрсатадиган тегишли таркибий бўлинма масъул қилиб белгиланади.
«Э-патруль» тизими фаолиятини рақамлаштиришда зарур компьютер ва бошқа ускуналарни харид қилиш билан боғлиқ харажатлар Ички ишлар вазирлигининг бюджетдан ташқари маблағлари ҳисобидан молиялаштирилади.
Бундан олдин Ўзбекистонда маъмурий ҳуқуқбузарликларга оид ишларни кўриб чиқиш ваколати Миллий гвардияга ҳам берилиши мумкинлиги, Ўзбекистонда ҳарбийлаштирилган соқчилик ва қоровуллик бўлинмалари ташкил этилиши тўғрисида хабар берилганди.
Изоҳ (0)