Тошкент шаҳрида Рамазон ойи кечаларидаги таровиҳ намози муносабати билан ҳар куни 18:00 дан 00:00 га қадар масжидлар яқинидаги йўллар транспорт воситалари ҳаракати учун беркитилади. Бу ҳақда шаҳар ҳокимлиги ахборот хизмати хабар қилди.

Қайд этилишича, қуйидаги ҳудудлар автомобиллар ҳаракати учун ёпилади:

• Қуддус Шариф масжиди бўйича: Янги Сергели кўчасидан – Қипчоқ кўчаси бўйлаб, Нилуфар кўчасигача бўлган қисми;
• Мирза Юсуф (Бодомзор) масжиди бўйича: Боғишамол кўчасидан Чингиз Айтматов кўчаси бўйлаб Қози тарнов 2-тор кўчасигача бўлган қисми;
• Шайх Зайниддин масжиди бўйича: Бешқайрағоч кўчасидан Кўкча дарвоза кўчаси бўйлаб, Нурафшон кўчасигача бўлган қисми;
• Новза масжиди бўйича: Муқимий кўчасидан Бунёдкор маҳаллий йўли бўйлаб, Сеул кўчасигача бўлган қисми ;
• Ислом ота масжиди бўйича: Фарғона йўли 5-тор йўлидан Фарғона йўлининг маҳаллий йўли бўйлаб, Олот кўчасигача бўлган қисми;
• Юнусобод Оқтепа масжид бўйича: Амир Темур шоҳкўчасидан Чинобод кўчаси бўйлаб, Дарвоза кент кўчасигача бўлган қисми;
• Фотимайи Заҳро масжид бўйича: Нурафшон кўчасидан Оқтепа Мажлисий кўчаси бўйлаб, Катта Оқ тепа кўчасигача бўлган қисми;
• Бўта бува масжид бўйича: Бунёдкор шоҳкўчасидан Бешқўрғон кўчаси бўйлаб, Бешқўрғон 4-тор кўчасигача бўлган қисми;
• Яккасарой масжиди: Шота Руставели кўчасидан Яккасарой кўчаси бўйлаб, Боғибўстон кўчасигача бўлган қисми;
• Усмон Бин Маҳзун масжиди: Қушбеги кўчасидан КҲАЙ бўйлаб, Чўпонота кўчасигача бўлган қисми.

«Ҳолатга қараб, намозхонлар сони кўпайиб кетган тақдирда, масжидга туташган бошқа йўллар ҳам ёпилиши мумкин.

Ҳайдовчилардан беркитилган кўчаларни олдиндан четлаб ўтишни илтимос қиламиз», — дейилади хабарда.

Эслатиб ўтамиз, Ўзбекистонда Рамазон ойи 2 апрелдан бошланади. Ўзбекистон мусулмонлари идорасининг «Қуръон ва тажвидни ўргатиш» бўлими томонидан 1443/2022 йил Рамазон ойида Тошкент шаҳри масжидларида таровиҳ намозларида ўқиладиган хатми Қуръоннинг кунлик тақсимоти белгиланди. Унга кўра, хатми Қуръон апрелнинг биринчи кунидан бошлаб, 27 сана – Қадр кечасида якунланиши мўлжалланмоқда.

Аввалроқ Ўзбекистон мусулмонлари идорасида Рамазон ойини муносиб кутиб олиш ва ислом дини тартиб-қоидалари асосида ойни кузатиш бўйича ишчи гуруҳ тузилгани, Қозоғистонда 2022 йилдаги Рамазон ойи 2 апрелдан бошланиб, 2 майга қадар давом этиши эълон қилингани тўғрисида хабар берилганди.