Ўзбекистон Экология ва атроф-муҳитни муҳофаза қилиш давлат қўмитаси хизмат машина паркига 10 дона электромобиль харид қилди. Бу ҳақда қўмита матбуот хизмати хабар берди.
«Келажакда қўмитанинг барча хизмат машиналарини электромобилларга алмаштириш ва уларни муқобил энергия манбалари ҳисобидан қувватлаш тизимини жорий қилиш режалаштирилган», — дейилади хабарда.
Аввалроқ Иқтисодий тараққиёт ва камбағалликни қисқартириш вазирлиги «Электромобильлар ишлаб чиқариш ва улардан фойдаланишни ташкил этишни қўллаб-қувватлаш чоралари тўғрисида»ги президент қарори лойиҳасини муҳокамага қўйганди. Ҳужжатга мувофиқ вазирликлар, идоралар, бюджет ташкилотлари, маҳаллий ҳокимият органлари ҳамда устав капиталида давлат улуши 50 фоиздан ортиқ бўлган корхоналар хизмат автомобиллари паркининг 2025 йилга қадар камида 10 фоизигача, 2030 йилга қадар 100 фоизи босқичма-босқич электромобилларга алмаштирилиши белгиланган.
Бунда, мазкур бандда назарда тутилган ташкилотлар томонидан 2022 йилдан бошлаб харид қилинадиган транспорт воситаларининг камида 20 фоизи электромобиллар бўлиши талаб этилади.
Бундан ташқари қарор лойиҳасида вазирликлар, идоралар, бюджет ташкилотлари, хўжалик бирлашмалари, маҳаллий ҳокимият органлари ҳамда устав капиталида давлат улуши 50 фоиздан ортиқ бўлган корхоналар электробусларни маҳаллий ишлаб чиқарувчи ва сервис хизматига эга корхоналардан харид қилиши белгиланган.
Мавзуга доир:
Изоҳ (0)