Ижтимоий тармоқларда Сирдарёдаги мактабларнинг бирида ўқувчи қизлар ўртасида бўлган жанжал видеотасвири тарқалди. Сирдарё вилояти ИИБ ҳолатга муносабат билдириб, видеодаги қизларнинг шахси аниқланганини маълум қилди.
Ижтимоий тармоқларда тарқалган видеода бир неча қизлар жанжаллашаётгани тасвирланган, йигитлар эса ҳолатни телефонда видеога олиб турган. Сирдарё вилояти ИИБ ходимлари томонидан барча воқеа қатнашчилари аниқланиб, суриштирув ишлари олиб борилган.
Маълум қилинишича, Гулистон шаҳридаги 4, 5 ва 18-сонли умумтаълим мактабларининг ўқувчи қизлари Instagram ижтимоий тармоғи орқали бир-бирини ҳақорат қилгани натижасида жанжал келиб чиққан. Икки нафар йигит эса уларнинг жанжалини видеога олиб, Telegram орқали тарқатиб юборган.
Ҳозирда ҳолат бўйича масъул ходимлар томонидан терговга қадар текширув ҳаракатлари олиб борилмоқда. Қизларнинг ота-оналари фарзандлари тарбиясига етарли даражада эътибор бермаганликларини тан олиб, узр сўраган.
Ўз навбатида Халқ таълими вазирлиги Сирдарёдаги ҳолат айни дамда мутасаддилар томонидан ўрганилаётганини маълум қилган.
«Шу ўринда ота-оналардан бундай салбий ҳолатлар юз бермаслиги учун фарзандлари тарбиясига эътиборли бўлишларини сўраб қоламиз», — дейилади хабарда.
Бундан олдин Асакада мактаб ўқувчилари ўртасида оммавий муштлашув содир бўлгани, Тошкентда икки мактаб ўқувчилари ўзаро жанжаллашгани тўғрисида хабар берилганди.
Изоҳ (0)