UNG Petro Тошкент шаҳрида бензин қуйиш шохобчаларидаги кунлик нархларни эълон қилди.
31 мартдан бошлаб Тошкент шаҳрида қуйидаги нархлар амал қилади.
Аи-80 ва Аи-92 «Татнефть» бензин қуйиш шохобчасида энг қиммат нархда сотилмоқда — 1 литр учун мос равишда 7 400 сўм ва 10 500 сўм. Аи-80 учун энг баланд нарх март ойи бошида 7 990 сўм билан Lukoil бензин қуйиш шохобчасида кузатилган эди. Шу тариқа Аи-80 турдаги бензиннинг ўртача нархларида пасайиш кузатилди.
Аи-92 энг арзон нархда Miss Petrol томонидан таклиф қилинмоқда. Аи-95 турдаги бензинни энг арзон нархда мижозларга фақатгина Mustang қуйиб бермоқда — 1 литрига 9 800 сўм.
Бундан ташқари Аи-92 ва Аи-95 нинг ўртача нархи март бошидан бери кўтарилди. Хусусан, 9 мартдан бошлаб UNG Petro, Mustang ва Lukoil’да Аи-92 мос равишда 8 800 сўм, 9 000 сўм ва 10 190 сўмдан сотилаётган эди. Эндиликда унинг нархи ҳар уччала шохобчада ҳам 300 сўмга кўтарилди.
Аи-95 эса март ойи бошида UNG Petro’да 9 800 сўм эди ва 200 сўмга кўтарилиб 10 000 сўм бўлди. Lukoil шохобчасида эса Аи-95 300 сўмга кўтарилиб 10 990 сўмга етди.
IBR Petroleum Station ва Poytaxt Oil бензин қуйиш шохобчаларида нархлар март ойи бошидагидек бир хил бўлмоқда. Аи-98 нархлари фақат UNG Petro’да 10 900 сўм билан маълум қилинган.
Бутун дунёда Россияга қўлланилаётган санкциялар туфайли нефть нархи ошиб бормоқда. Бу Ўзбекистонга ҳам ўз таъсирини ўтказади. Энг кучли таъсир импорт хом ашёсидан ишлаб чиқариладиган Аи-91, Аи-92, Аи-95 ва Аи-98 маркаларидаги бензинга нисбатан кузатилади.
Изоҳ (0)