Андижон вилоятининг Бўстон тумани «Нурафшон» маҳалласида яшовчи фуқаролар туман ҳокими Санобархон Носирова уларга ўзи яшайдиган жойдан 10 сотихдан ер беришни ваъда қилиб, сўнгра ваъдасини бажармаганини, ҳоким опанинг ваъдаси ваъдалигича қолганини айтмоқда. «Дарё» мухбири Умиджон Мамарасулов мазкур ҳолат юзасидан журналистик суриштирув ўтказди.
Мурожаатчилардан бири Лобархон Режапованинг айтишича, у фарзандини ўқитиш учун 10 сотих ердан даромад олишни мақсад қилиб, рўзғор учун ажратилган маблағини аукционда қатнашиш учун бошланғич бадал сифатида тўлаган.
«Турмуш ўртоғим ҳам, мен ҳам ҳеч қаерда ишламаймиз. Ўтган йили ўғлим университетга ўқишга кирди. Ер берилиши ҳақида эшитгач, шу боламнинг ўқишига ёрдам бўлар деб, оилавий шароитимдан келиб чиқиб, ўн сотих ерга пул бердим. Аввалига ишонтиришди. Энди униси бу, буниси у деб алдаб юрибди. Бунақа бўлар экан, бошида бериладиган ер узоқда, пул сарфламанглар деганда, рўзғоримдан пул ажратмасдим. Шунинг ортидан хўжайиним билан бақир-чақир бўлмасди, калтак емасдим. Хотин киши эканман-да, жигарим эзилса ҳам, шу боламга бўлсин, дебман. Ўн сотихга картошка эксам, озгина бўлса-да ҳосил олсам, дегандим», — дейди Лобархон Режапова.
Яна бир мурожаатчи Рўзихон Йўлдошева ҳам ўн сотих ерни аукциондан сотиб олиш учун қарз олганини, энди эса режалаштирган ишлари якунига етмасдан тўхтаб қолганини билдирмоқда.
«Икки қиз, бир ўғлим бор. Хўжайиним ўтганига 17 йил бўлди. Президент қарори асосида ер беради, деганда роса суюниб, чин юракдан тайёргарлик кўргандик. Айниқса, баҳор — илик узди вақтида, ўзимизда пул бўлмаса ҳам, қарз қилиб савдога пул топширгандик. Бизни алдаб, ғишт заводнинг олдига олиб бориб, роса югуртиришди. Ўша ердан берамиз дейишди. Ҳоким эса ‘бироз кеч қолибсизлар’, деб машинасига чиқиб, кетиб юборди. Гаплашмади ҳам. Бу ердагилар эса ерни сизларга бўлиб беради, деди. Афсуски, ҳалиям дараги йўқ. Энди бўлса узоқроқдан, яъни 5 километр наридан ер берамиз, дейишяпти. Лекин шахсан мен у ерга бориб келишга қийналаман. Кунимиз йўлда ўтиб кетади. Агар ҳоким ваъда берган жойдан, яқинроқдан берилса, яхши бўларди», — дейди Рўзихон Йўлдошева.
Мурожаатчиларнинг яна бири Хотирахон Араббоеванинг айтишича, ҳудуддаги 4-умумтаълим мактабида бўлиб ўтган фаоллар йиғилишида ҳоким ва прокурор аҳолига ер берилиши ҳақида ваъда бергач, нурафшонликлар аукционда қатнашишга рози бўлган ва тўлов қилган. Аҳолига берилиши керак бўлган ер манзили ўзгаргач эса ҳамма норози бўлмоқда.
«Яхши ва унумдор ердан берамиз, дейишгани учун ҳам бир ойдан бери ҳаракат қилаётгандик. Бизга ҳоким ва прокурор 4-мактабда ўтказилган учрашувда шахсан ваъда бериб, ‘Сизларга мана шу ғишт заводнинг олдидан ер берамиз, маъқулми?’, деганда биз у ерга экин экканлигимизни, яхши жой эканлигини айтиб, розилик берганмиз. Уларга ишониб ҳужжатларни тайёрладик. 16 февраль, савдодан бир кун аввал ер ‘Ўн бир обод’ массивидан берилишини эшитиб, жанжал қилдик. Ҳокимиятга бордик. Селектор йиғилиши бўлаётган экан, ҳолатни тушунтирдик. Шундан сўнг пулимизни қайтариб берамиз дейишганди. Ҳоким яна қўшимча қилиб, ‘йигирма сотихдан бўлса-да, бошқа одам топиб, савдони охирига етказиш керак’, деди. Икки кундан кейин 28 кишининг пулини қайтариб бераётганда ҳоким билан прокурор келиб, ‘Қани анави етти аҳмоқ? Мана шу ердан аҳолига ер берасизлар’, деди. Кейин ‘иложсиз эканмиз-да, шунинг орқасидан тирикчилик қиламиз-да’, деб кўнганимизда ҳоким ўринбосари ҳужжат олиб келиб, қўл қўйинг деди. Унга бир марта эмас, иккинчи марта алданаётганимизни айтиб, аввалига ер бериб, қозиқни қоқишларини, ундан кейин имзо қўйишимни билдирдим. Хуллас, қоғозга ҳеч ким қўл қўймади», — дейди Хотирахон Араббоева.
«Дарё» мухбири билан суҳбатлашган «Нурафшон» маҳалла фуқаролар йиғини раиси Абдупатто Умаров маҳалла фаолларининг ҳоким билан учрашувини эслолмаслигини айтиб, унда қатнашмаганини билдирди. Бироқ мурожаатчилар далиллар билан эслатгач, ҳоким берган ваъдасини бажарганини таъкидлаб, ғишт завод олдидаги ерларни ҳоким билмаслигини қайд этган. Раис суҳбат давомида давлат одами эканлигини, шу сабабли нотўғри гапирмаслиги ва ёлғон маълумот бермаслигини бир неча маротаба такрорлаган.
«Ер тўғрисида жанжал бўлаётганди. Булар билан гаплашиб, тушунтирдим. Булар сув йўқ дейишди. Шахсан ўзим бориб кўриб келдим. Фермер томонидан иккита насос ўрнатилган. Тўғри, бироз узоқлиги бор. Аммо фермер ‘машинамни бераман, булар барибир кунда келиб ишламайди. Бир кун келса, ўн кун дам олади’, деган. Ҳаммаси рози бўлди. Рози бўлмаганлар ‘пулимни қайтариб берасизлар’, деди. Бор гап шу. Ўзингиз биласиз, ер бериш мажбуриймас», — дейди маҳалла раиси Абдупатто Умаров.
Бўстон тумани ҳокимининг қишлоқ ва сув хўжалиги масалалари бўйича ўринбосари Зокиржон Дармонов аҳолига берилиши керак бўлган 27,9 гектар ер вилоят ҳокими қарори билан аукционга қўйилганини, ерни ютиб олганлар эса экишни бошлашганини билдирган. Масъул мурожаатчилар ҳақида фикр билдирар экан улар нима хоҳлашаётганини тушунмаётганини айтган.
«Ишсизлар учун берилаётган 10 сотихли ерларни ‘Нурафшон’ маҳалласида яшовчилар бироз узоқ дейишмоқда. Лекин ўша ерга ўзим бордим. Ер олганлар бугундан картошка экишни бошлади. Аммо бу одамлар узоқ деяпти. Ваҳоланки, фермер хўжалиги раҳбари ўзига тегишли машинасида обориб, қайтариб ташлаб қўяман, ҳаттоки култивация ишларида тракторларигача ёрдам бераман деган. Энди булар ‘Ҳоким бизга ваъда берган’, деб бошқача гапиряпти. Балки ўзлари ҳам бир хулоса қилиб кўришар. Лекин ҳоким айтган жойга вилоятдан келган ‘гидрозем’нинг ходимлари рухсат беришмаган», — дейди Зокиржон Дармонов.
Изоҳ (0)