Ўзбекистонда электр энергияси ишлаб чиқарадиган янги станциялар қуриш, энергетика тармоқларини ривожлантириш учун камида 20 миллиард доллар керак. Бу ҳақда энергетика вазири ўринбосари Шерзод Хўжаев 24–26 март кунлари ўтказилган Тошкент халқаро инвестициялар форумида «Дарё» мухбирига берган интервьюсида маълум қилди.
Вазир ўринбосарининг айтишича, 20 миллиард доллар йирик маблағ бўлгани учун давлат уни тўлиқ инвестиция қила олмайди.
«2030 йилгача молиявий ресурларга бўлган эҳтиёжимизни ҳисоблаб чиққанимизда, электр энергиясини ишлаб чиқарадиган янги станциялар қуриш ва тармоқларни ривожлантириш учун энг камида 20 миллиард доллар пул сарфлашимиз кераклиги аниқланди. Аммо 20 миллиард доллар давлат инвестицияси бўла олмайди. Бунинг 70-80 фоизи хусусий инвестиция бўлиши керак, қолган 20-30 фоизини давлат сарфлаши мумкин. Асосий сармояларни хусусий сектор олиб келиши лозим. Хусусий сектор қачон олиб келади? Қачонки, ишонса. Кўришингиз мумкин, иқтисодиётнинг бошқа соҳаларидан фарқли ўлароқ, энергетикага ташқи инвесторларнинг ишончи катта. Ўзбекистондаги энг йирик миқдордаги тўғридан-тўғри хорижий инвестициялар асосида қурилаётган лойиҳалар энергетика соҳасида», — деди вазир ўринбосари.
Шерзод Хўжаев энергетикага нега ташқи қарз ва давлат бюджетидан йирик миқдордаги маблағлар йўналтирилишига ҳам изоҳ берди.
«Унутмаслик лозимки, энергетика — бутун иқтисодиётнинг локомотиви. Биз ташқи қарз эвазига қурган станцияларимиз ёки тармоқларимиз етказиб берган энергетика бутун иқтисодиётни ривожлантиради. Лекин шундай бўлса ҳам, давлат кафолати остидаги ташқи қарзни жалб қилишдан босқичма-босқич воз кечишимиз керак. Бу борада аниқ мақсадимиз бор. Халқаро кредит рейтингларини олиш, компанияларимизни мустақил, давлат кафолатисиз кредит жалб қилишга имконияти бўлсин, бунинг учун компанияларда бошқарув тизимимизни, ходимларнинг фикрлашини ўзгартиришимиз керак» — деди вазирлик расмийси.
Унинг қўшимча қилишича, соҳага янги технологияларни жорий қилмасдан туриб юқори самарадорликка эришиб бўлмайди.
«Албатта, энергетикага биринчи навбатда янги, замонавий технологияларни жорий қилиш керак. Қолаверса, ёш кадрларни тайёрлашга жуда катта эътибор қаратишимиз шарт. Ёш кадрларимиз технологияларни амалга татбиқ қилиб, келажакда фойдаланади», — деди Шерзод Хўжаев.
Аввалроқ Сурхондарё вилояти Ангор туманида янги иссиқлик электр станцияси қурилишига бағишланган маросим бўлиб ўтгани хабар қилинганди. Тадбирда президент Шавкат Мирзиёев ушбу лойиҳанинг умумий қиймати 1 миллиард 200 миллион долларни ташкил этиб, станция қурилиши давлат-хусусий шериклик асосида амалга оширилишини айтган.
Шунингдек, президент қарори билан Ўзбекистонда Қайта тикланувчи энергия манбалари миллий илмий-тадқиқот институти ташкил этилган.
Энергетика вазири ўринбосари Шерзод Хўжаев билан суҳбатнинг тўлиқ матни «Дарё»да эълон қилинади.
Изоҳ (0)