Ўзбекистонда айрим ипотека кредитлари қимматлашди

Аввалроқ Марказий банк асосий ставкани 14 фоиздан 17 фоизга кўтаргани ҳақида хабар берилган эди.

Бу, тахмин қилинганидек, аҳоли учун кредитлар бўйича фоиз ставкаларининг ошишига олиб келди. Баъзи банкларда ипотека кредитлари бўйича ставка бир неча фоиз пунктига ўсди.

Масалан, февраль ойида «Davrbank»да ставкалар 25 фоиз атрофида бўлган бўлса, асосий ставка ошгандан кейин 27 фоизга етди. «Капиталбанк»да максимал ставка февраль ойида 26 фоиз бўлган бўлса, энди 28 фоизни ташкил қилади.

Бошқа банкларда ҳам ставкаларнинг ўсиши кутилмоқда. Бу асосий ставканинг оширилишидан кейин табиий ҳодиса — шу йўл орқали Марказий банк иқтисодиётни «ўзига келиши» учун уни секинлаштирмоқчи.

Ипотека давлат дастури

Ўзбекистонда ипотеканинг икки тури мавжуд — оддий ва давлат дастури доирасида. Иккинчиси бўйича ставкалар йил охиригача ўзгаришсиз қолади.

Аввалроқ Ўзбекистонда автокредитлар қимматлашгани ҳақида хабар берилган эди.