Ўзбекистонда Uzcard-МИР карталарини қаерда очиш мумкин ва у нимага керак?

Uzcard-МИР кобейж картасини бешта банкда очтириш мумкин. Бу ҳақда Uzcard матбуот хизмати хабар берди.

Булар:

• «Алоқабанк»
• «Халқ банки»
• «Қишлоқ қурилиш банк»
• «Туронбанк»
• «Микрокредитбанк»

Uzcard-МИР бу иккита турли хил — маҳаллий Uzcard ва Россиянинг «МИР» тўлов тизимида ишловчи карталардир. 

Ўзбекистонда транзакциялар сўмда, Россияда эса рублда амалга оширилади. Чет эл валютасида қўшимча ҳисоб очтиришнинг ҳожати йўқ.

Ўзбекистонда ушбу карталар ёрдамида терминалларда тўлаш ва банкоматлардан пул ечиш, маблағларни картадан картага ўтказиш, QR-код орқали тўлов қилиш ва онлайн харидларни амалга ошириш мумкин. 

Ўзбекистондан ташқарида Uzcard-МИР карталари Россия, Беларусь, Арманистон, Қирғизистон, Қозоғистон, Тожикистон, Жанубий Осетия, Абхазия, Туркия, Вьетнамда қабул қилинади.

Аввалроқ Uzcard-МИР карталари Ўзбекистон ва Россия ўртасида пул ўтказмаларини амалга ошириш йўлларидан бири эканлиги ҳақида хабар берилган эди.