Самарқанд вилояти Нуробод, Жомбой ва Ургут туманларида катта миқдорда ноқонуний ер сотиш ҳолатларига чек қўйилди, деб хабар бермоқда ЎзА.
Қайд этилишича, Давлат хавфсизлик хизмати Самарқанд вилояти бошқармаси вилоят ИИБ ҳамда иқтисодий жиноятларга қарши курашиш департаменти вилоят бошқармаси ходимлари билан ҳамкорликда коррупцияга қарши курашиш йўналишида тезкор тадбирлар ўтказган. Натижада Нуробод туманидаги МЧЖ раҳбари, Қ.З. (1994 йилда туғилган) жамият тасарруфидаги 10 гектар лалми ер майдонини 250 минг доллар эвазига маҳаллий фуқарога сотишга келишиб, сўралган пулнинг 100 минг долларини олаётган вақтида ушланган.
Яна бир тадбирда Самарқанд шаҳрида яшовчи А.И. (1989 йилда туғилган) ижара асосида фойдаланиб келаётган Жомбой тумани «Мирза-Пай» ирригация тизими бошқармасига қарашли 1 гектар суғориладиган ер майдонини фуқарога 60 минг доллари эвазига ҳокимият тизимидаги танишлари орқали расмийлаштириб беришни ваъда қилгани аниқланган. У маҳаллий фуқародан 30 минг долларни олаётган вақтида ашёвий далиллар билан қўлга олинган.
Шунингдек, Ургут туманидаги МЧЖ раҳбари Х.А. (1964 йилда туғилган) эса жамиятга тегишли бўлган 5 сотих ер майдонини машиналарга хизмат кўрсатиш марказини ташкил қилиш учун 35 миллион сўмга маҳаллий фуқарога сотаётган вақтида ушланган.
Ҳозирда юқоридаги шахсларга нисбатан жиноят кодексининг тегишли моддалари билан жиноят ишлари қўзғатилган. Суриштирув ҳаракатлари олиб борилмоқда.
Мавзуга доир:
Изоҳ (0)