Ёғингарчиликлар тугаб, қуруқ об-ҳаво кузатилиши билан йўллар таъмирланади — Тошкент шаҳар ҳокимлиги

Тошкент шаҳар ҳокимлиги сўнгги кунлардаги ёғингарчиликлар сабаб аҳволи ёмонлашган йўллар таъмирланишини билдирди.

«2022 йилда одатдагидан кўп ёғингарчилик кузатилгани боис шаҳримиздаги йўлларда жиддий носозликлар юзага келди, чуқурликлар сони ҳам кўпайди.

Бу ҳолат Тошкент шаҳар ҳокимлиги томонидан назоратга олинган бўлиб, шаҳар Ободонлаштириш бош бошқармаси томонидан йўллардаги носозликлар хатловдан ўтказилган, таъмирлаш техникаси шай ҳолатга келтирилган.

Ёғингарчиликлар тугаб, қуруқ об-ҳаво кузатилиши билан шаҳримиздаги таъмирталаб кўчаларни соз ҳолатга келтириш бўйича режалаштирилган ишлар бошлаб юборилади. Бунинг учун зарур техника, маҳсулотлар ва иш кучлари етарли.

Ҳурматли ҳамшаҳарлар, айни дамдаги ноқулайликлар учун узр сўраб, тез орада пойтахтимиз йўллари текис ва равон ҳолга келтирилишини маълум қиламиз», — дейилади ҳокимлик хабарида.

Бундан аввал Тошкент метрополитени сув ўтган станциялар кунлар исигандан кейин таъмирланишини маълум қилганди.