Ўзбекистон йўлларида: Niva пиёдани уриб кетди, Nexia бошқарувни йўқотиб ағдарилди

Сўнгги кунларда мамлакат йўлларида содир бўлган йўл-транспорт ҳодисалари тафсилотларини тақдим этамиз.

Niva пиёдани уриб кетди

Шароф Рашидов тумани «Яхтанлик» маҳалла фуқаролар йиғинида йўл-транспорт ҳодисаси рўй берди. Туманнинг «Саройлик» маҳалласида истиқомат қилувчи шахс бошқарувидаги Niva билан йўл чеккасида ҳаракатланаётган пиёдани уриб юборди.

Оқибатда «Тараққиёт» маҳалла фуқаролар йиғинида истиқомат қиладиган жабрланувчи бош мия жароҳати билан шифохонага ётқизилган. Ҳолат юзасидан терговга қадар текширув ўтказилмоқда.

Зоминда Nexia уриб кетиши оқибатида пиёда шифохонага жойлаштирилди

Зомин тумани «Ўзбекистон» маҳалла фуқаролар йиғини ҳудудидан ўтувчи Даштобод—Зомин 4-Р йўлининг биринчи километрида туманнинг «Чорвадор» қишлоқ фуқаролар йиғинида яшовчи шахс бошқарувидаги Nexia билан йўлни кесиб ўтаётган пиёдани уриб юборди.

Оқибатда «Ўзбекистон» маҳалла фуқаролар йиғинида истиқомат қиладиган жабрланувчи бош мия лат ейиши оғир даражаси, мия комаси, иккала оёқ сидирилган жароҳати, травматик шок оғир даражаси ташхиси билан шифохонанинг жонлантириш бўлимига ётқизилган. Ҳолат юзасидан терговга қадар текширув ўтказилмоқда.

Шароф Рашидов туманида Nexia ағдарилиши оқибатида бир киши вафот этди

Шароф Рашидов тумани «Хайробод» маҳалла фуқаролар йиғинидан ўтувчи Тошкент—Термиз М-39 йўлининг 997-километрида йўл-транспорт ҳодисаси рўй берди. Самарқанд вилояти Иштихон тумани «Булоқбоши» маҳалла фуқаролар йиғинида яшовчи шахс ихтиёридаги Nexia бошқарувини йўқотди ва автоулов йўл четига ағдарилди.

Оқибатда салонда бўлган йўловчи, Самарқанд вилояти Иштихон тумани «Файзобод» маҳалла фуқаролар йиғинида истиқомат қилган шахс тан жароҳатлари олиб, воқеа жойида вафот этган. Яна бир йўловчи, Самарқанд вилояти Паст Дарғом тумани «Чимёбот» маҳалла фуқаролар йиғинида яшовчи фуқаро ўнг жағ соҳасининг ёпиқ синиши ташхиси билан шифохонага ётқизилди.