Ўзбекистонда шантаж қилиш йўли билан ўсмирлардан пул ундириб келган канални Telegram блоклади, дея хабар қилмоқда «Podrobno.uz».
Маълум қилинишича, Telegram-каналнинг асосий мақсади мактаб ўқувчилари ва ўсмирлардан пул ундириш бўлган. Канал админлари ўсмирларнинг ижтимоий тармоқлардаги профилларидан олинган ҳақиқий суратларини каналга жойлаштириб, уларнинг тагига суратдагилар ноанъанавий йўналиш вакиллари ёки ижтимоий масъулияти паст шахслар экани ҳақида изоҳлар қолдирган. Кейин ушбу пост ҳаволасини (линкини) 150 минг сўм эвазига ўчириш таклифи билан сурат эгасига юборган.
Миллий масс-медиани қўллаб-қувватлаш ва ривожлантириш жамоат фонди матбуот котиби маълум қилишича, фонд дарҳол Telegram асосчиси Павел Дуров билан боғланиб, канални блоклаб қўйишни сўраган.
Фонд Павел Дуровга кибербуллингнинг олдини олишда шахсий иштироки, тезкор ёрдами ва қўллаб-қувватлаши учун миннатдорчилик билдирган.
«Биз Павел Дуров ва унинг жамоаси ноқонуний контент тарқалишининг олдини олишга, айниқса, ўсмирлар хавфсизлигига жиддий ёндашганини қадрлаймиз. Биламизки, 2018 йилнинг ноябрь ойидан бери Telegram болалар безорилиги билан шуғулланаётган 18 493 та канал ва гуруҳларни ёпди. Компания ўз миссиясига — бутун сайёрада алоқа учун хавфсиз шароитларни таъминлашга қатъий амал қилади», — деб ёзади фонд матбуот котиби.
Кибербуллинг ҳолатлари ҳақида stopCA@telegram.org манзилига мурожаат қилиш сўралади.
Мавзуга доир:
- Андижонда 16 ёшли қизнинг шахсий маълумотларини тарқатмаслик учун 200 минг олган йигит ушланди
- Андижонда ўзидан 10 ёш катта аёлнинг суратларини интернетда тарқатмаслик учун 200 доллар талаб қилган 19 ёшли йигит ушланди
- Сурхондарёда танишига тегишли видеони интернетда тарқатмаслик учун минг доллар сўраган эркак ушланди
Изоҳ (0)