Тошкент халқаро инвестиция форуми доирасида Ўзбекистон Соғлиқни сақлаш вазирлиги ва Саудия Арабистонининг HMG компанияси ўртасида ўзаро англашув тўғрисида Меморандумни имзолаш маросими бўлиб ўтди. Бу ҳақда Инвестициялар ва ташқи савдо вазирлиги хабар қилди.
HMG (Dr.Sulaiman al-Habib Medical Group) Яқин Шарқнинг хусусий секторида тиббиёт хизматларининг илғор етказиб берувчиларидан бири ҳисобланади. Саудия Арабистони Подшоҳлиги, Бирлашган Араб Амирликлари ва Баҳрайн подшоҳлигининг 18 та тиббиёт муассасаси компания бошқаруви остида ҳисобланади.
Ҳужжатга мувофиқ, Ўзбекистон соғлиқни сақлаш тизимига тиббий маълумотларни рақамлаштириш ва марказлаштириш, шунингдек, беморлар билан ўзаро мулоқот жараёнларини такомиллаштириш мақсадида замонавий технологиялар, жумладан, Тошкентнинг йирик тиббий муассасаларидан бирини HMG етказиб берадиган IT-ечимларга улаш бўйича синов дастури жорий қилинади.
Шунингдек, Ўзбекистонда ўзбек тиббиёт ходимларини ўқитиш ва малакасини ошириш мақсадида HMG тиббиёт академияси ташкил этилади. Бундан ташқари, ҳар йили кичик тиббиёт ходимларидан камида 10 та ходим малакасини ошириш мақсадида Саудия Арабистонидаги HMG касалхоналарига юборилади.
Ҳужжатда Тошкентда HMG’нинг илғор ва замонавий технологиялар билан жиҳозланган шифохона ва касалхоналарининг стандартларига мувофиқ бўлган замонавий кўп тармоқли тиббий комплексини яратиш бўйича янги инвестиция лойиҳасини амалга ошириш тўғрисида ҳам сўз боради.
Меморандумни имзолаш маросими инвестициялар ва ташқи савдо вазири Сардор Умурзоқов ҳамда Саудия Арабистони подшоҳлиги инвестициялар вазири Холид ал-Фалиҳ иштирокида бўлиб ўтган. Ҳужжат остига Ўзбекистон соғлиқни сақлаш вазири Беҳзод Мусаев, Инвестициялар ва ташқи савдо вазирлиги ҳузуридаги тўғридан-тўғри инвестициялар жамғармаси бош директори Отабек Назиров ва HMG’нинг бош амалиётчи директори доктор Абдулваҳоб ал-Абдулваҳоб ўз имзосини қўйган.
Эслатиб ўтамиз, 18 март куни Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтди. Президент очиқ мулоқотга тайёргарлик жараёнида келиб тушган муаммоларнинг ечимлари ва бугунги таклифлар бўйича қисқа муддатда қарорлар қабул қилинишини таъкидлаганди.
Мулоқот давомида соғлиқни сақлаш тизимида ислоҳотлар давом эттирилиши қайд этилди. Давлат раҳбари ҳозирда соҳада трансформация жараёни кетаётганини айтди. Хусусан, Ўзбекистонда 1 апрелдан бошлаб чет элдан олиб кириладиган тиббий жиҳозлар ҚҚС ва божхона божидан озод қилиниши ва тез тиббий ёрдам тизимидаги барча Damas’лар 2025 йилгача замонавий автомобилларга алмаштирилиши таъкидланди. Бундан ташқари, Ўзбекистонда тиббиёт ходимларининг ойлик маоши камида 10 фоизга оширилиши, тиббиёт олийгоҳлари талабаларига шифокор бўлиб ишлашга рухсат берилиши маълум қилинди.
Изоҳ (0)