Фарғонада 18 ёшли йигит банкоматни бузаётганида қўлга тушди

Фарғона вилояти Бувайда туманида 20 март куни банкоматни очишга уринган шахс қўлга тушди, деб хабар бермоқда ЎзА.

Қайд этилишича, Бувайда тумани қўриқлаш бўлимига 20 март куни тунги соат 00:25 да номаълум шахс томонидан талончининг банкомат эшикларини бузаётгани ҳақида хабар келиб тушган. Олинган хабарга кўра, воқеа жойига етиб борган тезкор гуруҳ ходимлари томонидан Universal банк Бувайда филиалига қарашли банкоматлардан бирини номаълум шахс темир кескич ёрдамида бузаётгани аниқланиб, қўлга олинган. У ички ишлар органларига топширилган.

Олиб борилган дастлабки суриштирув натижасида қоидабузар 18 ёшли фуқаро Р.Б. экани маълум бўлган. Ҳозирда ҳолат юзасидан суриштирув ишлари олиб борилмоқда.

Аввалроқ Андижонда банкоматни бузиб, ундаги пулларни ўғирлашга уринган шахс қўлга олингани хабар қилинганди. Шунингдек, Тошкент вилоятида 145 миллион сўмлик банкоматни ўғирлаган 3 нафар йигит ушлангани ва банкоматдан қарийб 20 миллион сўм ўғирлаган шахслар ушлангани ҳақида хабар берилган.