Farg‘ona viloyati Buvayda tumanida 20-mart kuni bankomatni ochishga uringan shaxs qo‘lga tushdi, deb xabar bermoqda O‘zA.
Qayd etilishicha, Buvayda tumani qo‘riqlash bo‘limiga 20-mart kuni tungi soat 00:25 da noma’lum shaxs tomonidan talonchining bankomat eshiklarini buzayotgani haqida xabar kelib tushgan. Olingan xabarga ko‘ra, voqea joyiga yetib borgan tezkor guruh xodimlari tomonidan Universal bank Buvayda filialiga qarashli bankomatlardan birini noma’lum shaxs temir keskich yordamida buzayotgani aniqlanib, qo‘lga olingan. U ichki ishlar organlariga topshirilgan.
Olib borilgan dastlabki surishtiruv natijasida qoidabuzar 18 yoshli fuqaro R.B. ekani ma’lum bo‘lgan. Hozirda holat yuzasidan surishtiruv ishlari olib borilmoqda.
Avvalroq Andijonda bankomatni buzib, undagi pullarni o‘g‘irlashga uringan shaxs qo‘lga olingani xabar qilingandi. Shuningdek, Toshkent viloyatida 145 million so‘mlik bankomatni o‘g‘irlagan 3 nafar yigit ushlangani va bankomatdan qariyb 20 million so‘m o‘g‘irlagan shaxslar ushlangani haqida xabar berilgan.
Izoh (0)