Режиссёр Зулфиқор Мусоқовнинг «Осмондаги болалар» фильми қаҳрамони Наргиз — Малика Алимова «Дарё» интернет-нашри учун эксклюзив интервью берди. Суҳбат давомида у ҳаётда фильм қаҳрамонлари билан қандай муносабатда эканлигини очиқлади.
— «Осмондаги болалар» фильмининг барча актёрлари билан яқин бўлиб кетгандик. Зулфиқор Мусоқов ҳам янги фильм олсалар, албатта, премьераларига бизни чақирарди. Тошкентда бўлсам, албатта, мен ҳам премьераларда иштирок этардим. Аммо бир-икки йил Тошкентда яшамаганлигим учун боролмаган пайтларим ҳам бўлган. Бир муддат онам билан Европада яшаганман, ундан кейин иш бўйича Россияга ҳам тез-тез бориб турардим. Турмушга чиқмасимдан аввал 15 дан ортиқ мамлакатга саёҳат қилганман. Фильмда Жавоҳир ролини ижро этган Азиз билан гаплашиб турамиз. Қолганларни эса ижтимоий тармоқлар орқали кузатиб тураман. Лола ролини ижро этган Кристина Таирова Ўзбекисондан кўчиб кетган. У оиласи билан Қозоғистонда яшайди. У билан ҳам баъзи пайтларда ижтимоий тармоқлар орқали гаплашиб турамиз. Кристинани сўнгги марта «Берлин—Оққўрғон» фильмининг премьерасига келганида кўрганман. Аммо «Осмондаги болалар» фильмининг барча ижодкорлари билан муносабатим яхши.
Барчамиз дебютант бўлсак ҳам, бирорта саҳнанинг суратга олиниши қийин кечмаган. Қайтага, бир-биримизни аввалдан биладигандек, маза қилиб ишлаганмиз. Фақатгина Ҳамдам роли руҳий жиҳатдан жуда оғир эди. Унга жуда ачинганман.Фильмни суратга олиш жараёнида қизиқарли воқеалар жуда кўп бўлган. Масалан, Ҳамдамнинг новвойхонада ишлайдиган саҳнаси суратга олинаётганда, нонларни маза қилиб еганмиз. У ерда ёпиладиган нон жуда мазали эди.Менимча, фильм олтита бош қаҳрамоннинг ҳаётида фақат ширин хотиралар билан муҳрланган бўлса керак. Кун келиб болаларимга фильмнинг суратга олиниши билан боғлиқ ширин хотиралар ҳақида сўзлаб бераман.
Изоҳ (0)