Қийин вазиятларда томоша қилиш тавсия этиладиган фильмлар

Кайфият тушиб, ўзингизни ёмон ва қийин аҳволда ҳис қилганингизда яхши фильм муаммоларингизни сал бўлса-да, енгиллаштиришга ёрдам беради. Қуйидаги картиналарни томоша қилиб, бахтли бўлиш нақадар осон эканлигини англайсиз.

«Индиана Жонс», трилогия

«Ту-ту-ру-ту, ту-ту-ту, ту-ту-ру-ту, ту-ту-ту-ту» — бу оҳангни эшитишингиз билан кўз олдингизга мард ва ҳеч нарсадан тап тортмайдиган Индиана Жонс образи келгани аниқ. Индиана Жонс ҳар қандай ҳолатда ёрдамга ошиқади, ўз кучига ишониш орқали ҳатто умидсиз бўлиб туюлган вазиятда ҳам чиқиш йўли борлигига умид қилади. Албатта, дўстларининг ёрдам билан.

«Камон, Камон»

Журналист (Хоакин Феникс) синглисининг илтимосига кўра, тўққиз ёшли жиянига қараб туради ва у билан тил топишишга ҳаракат қилади. Деярли икки соатлик фильмда бошқа ҳеч нарса содир бўлмайди, лекин унда олам-олам маъно бор. Қаҳрамонларнинг ҳар бирининг ўзига хос қийинчиликлари ва муаммолари бор. Қаҳрамонлар ўзларининг оғриқли тажрибасини бир-бирига яқинлашиш имкониятига айлантирадилар.

Бу сокинлик ва одатий кундалик муаммолар ҳақидаги фильм, лекин шундай қийинчиликларни ҳам бир-бирига ёрдам бериш орқали биргаликда бошдан кечириш осонроқ.

«Сумерки»

«Сумерки» пастки лабини тишлашни яхши кўрадиган ва негадир мактабга боришда давом этаётган юз ёшли вампирнинг кўнглини кўтаришга қодир бўлган ўқувчи қиз ҳақидаги энг мелодраматик севги ҳикоясидир. Баъзилар учун «Сумерки» уларга бахтли ўсмирлик йилларига қайтишга ёрдам беради. Деразадан ташқарида содир бўлаётган воқеалардан фарқли ўлароқ, кимдир фильм ёрдамида деярли икки соат давомида Американинг энг олис чеккасидаги хаёлий фантазия оламига бориш имкониятига эга бўлади.

«Моҳир жосуслар каби»

Эдгар Райт ҳали ҳам сўнгги ўн йилликларнинг энг яхши комедиячиларидан бири бўлиб, унинг фильмларини қайта-қайта кўриб завқ олиш мумкин. «Моҳир жосуслар каби» — Лондон полицияси (Симон Пегг) ва маҳаллий овсар (Ник Фрост)нинг илиқ дўстлиги ҳақидаги ажойиб фильм. Овлоқ жойда содир этилган сирли қотилликларни тергов қилиш ҳақидаги кинояли ҳикоя Райтнинг ўзига хос услуби билан тўлдирилган.

«Яхши йил»

Ушбу фильм инсонларга оддий нарсаларни эслатади, афсуски, кундалик шовқин-суронда тез-тез унутилаётган ҳисларни ҳам. Бош қаҳрамон — Макс аллақачон улғайган ва Лондон фонд биржасининг (Расселл Кроу ўйнаган) йирик корчалони. Амакисининг ўлимидан сўнг, Макс Провансдаги вино заводини мерос қилиб олади ва дарҳол уни сотишга қарор қилади. Лекин ҳаёт уни ўзига ва бу дунёнинг моҳиятига янгича қарашга мажбур қилади.

Доимий равишда яхшироқ ҳаётга интилиш йўлида бахтли бўлиш биз ўйлагандан ҳам осон эканлигини унутамиз. Провансдаги вино заводи, Марион Котиляр ва француз виноси атмосферасидан ташқари, «Яхши йил» бахт атрофимизда — айнан ҳозир ва шу ерда эканлигини эслатади.

«Андиша ва ғурур»

Оператор Роман Осин томонидан моҳирона суратга олинган инглиз қишлоқларининг панорамали тасвирлари ҳақиқий визуал медитациядир. Фильм сизни чексиз хабарлар бўлмаган дунёга усталик билан олиб киради, янгиликлар эса бир неча кунлик кечикиш билан почта орқали олинади. Бингли ва Дарси уйларининг интерьерини, Жейн ва Лиззининг балга қандай тайёргарлик кўришини, Беннетнинг оилавий ҳаётини томоша қилиб дам оласиз, эрталабки туманда ўтлоқлар бўйлаб қаҳрамонлар билан сайр қиласиз. Жейн Ostenнинг ўлмас сюжети меҳрни оиладан, дўстлардан, яқинлардан излаш кераклигини яна бир бор эслатиб ўтади.

«Қияликдаги балиқча Понё»

Миязаки мухлисларининг баъзилари мультфильм жуда ёш томошабинларга мўлжалланган, деган баҳона билан Понёни четга суриб қўяди. Аммо бу инсон ва табиат уйғунлиги, унинг бошқа асарлари сингари дунёдаги ҳар бир жонзот билан умумий тил топиш қобилияти ҳақидаги чуқур фалсафий ҳикоя. Миязаки ўз мақсадини насиҳат орқали етказиш ўрнига, уни япон мифологияси акс-садолари билан ажойиб эртакка айлантиради. Фильмда тўлиб-тошган ғайрат ҳам, юқумли бахт ҳам бор, лекин энг муҳими — болакайнинг денгиз жонзотига бўлган чексиз севгиси, у энди уни ҳимоя қилишга мажбур, чунки у бошқача йўл тута олмайди. Чунки фақат севги ва меҳргина бизни қутқара олади.

«Билли Медисон»

Мия фаоллиги даражасини энг паст кўрсаткичгача тушира оладиган ўта кретин комедия. Аллақачон вояга етган Билли Медисон (Адам Сендлер) меҳмонхоналарга эга бўлган миллионер дадасининг пулига яшайди. Кунини пиво ичиш-у журналларни варақлаш билан ўтказадиган ўғил нимадир қила олишини исботлашга қарор қилади ва гаров ўйнаб, мактабга қайтади. Бир неча ой ичида у ўтказиб юборган барча нарсаларни — бошланғич синфдаги имлони ўрганишдан тортиб юқори синфдаги қўпол зўравонликларни бошдан кечиришгача бўлган ўн биринчи синфни тугатиши керак.

«Юлдузли чанг»

Фильмда ҳамма нарса бор: саргузашт, мўъжиза ва севги. Оддийгина йигит (Чарли Кокс) севган қизининг туғилган кунига осмондан тушган юлдузни топиб совға қилишга ваъда беради. Қаҳрамон Мишел Пфайфер бошчилигидаги жодугарлар ҳам абадий ёшлик учун худди шу юлдузни қидирмоқда. Йиқилган юлдуз гўзал қиз бўлиб чиқади (Клер Дейнс). Шунингдек, Нил Гейманнинг мазкур эртагида шафқатсиз шаҳзодалар, хушмуомала қароқчи (ақл бовар қилмайдиган даражада кулгили Роберт Де Ниро) ва жуда кўп юмор ҳамда мўъжизалар мавжуд. Буларнинг барчаси бир-бирига боғланган, аммо зулмат ғалаба қозонгандек туюлса-да, севги ва дўстлик ҳаммани қутқаради.