«Мегафон» халқаро мобил алоқа операторлари ассоциациясидан четлатилди

GSMА алоқа операторларининг глобал ассоциацияси 1995 йилдан бери ташкилот аъзоси бўлган Россиянинг «Мегафон» компанияси четлатилганини эълон қилди. Бу ҳақда GSMА баёнотига таяниб «Ведомости» хабар берган.

Баёнотда компаниянинг ассоциациядан четлатилишига нима сабаб эканлиги қайд қилинмаган.

«Халқаро ассоциациянинг бундай шошилинч, асоссиз қарор чиқарганидан ҳайрон қолдик, ушбу ҳаракатнинг ҳуқуқий асослари ҳам мавжуд эмас, биз ўз мақомимизни қайта тиклаш йўлларини кўриб чиқяпмиз», — деган «Мегафон» вакили.

Шунингдек, GSMА Россия компаниясининг роуминг ҳамкорлари рўйхатидан (Roaming partner listing, RPL) ҳам ўчирилганини маълум қилган. «Мегафон»дагилар бу компаниянинг халқаро роумингдан узилиб қолишини англатмаслигини билдирган. Компания вакили RPL — ҳамкорлар учун ахборот-маълумот рўйхати эканлиги, рўйхатда бўлиш ёки ундан чиқиш операторлар ўртасидаги келишувларга таъсир қилмаслигини тушунтирган.

GSMА — коператорлар ва қурилмалар ишлаб чиқарувчи компанияларнинг энг йирик халқаро бирлашмаси. Ташкилот 1995 йилдан бери мавжуд ва унинг таркибига бутун дунёда мингдан зиёд компания ҳамда ташкилотлар аъзо сифатида кирган, улар орасида Россиянинг «МТС», Beeline ҳамда Теле2 компаниялари ҳам бор.

GSMА фаолиятининг асосий йўналишларидан бири техник стандартларни ишлаб чиқиш ва белгилашдан иборат. «Ведомости»нинг қайд этишича ассоциация мобил алоқа тармоқларининг келгуси авлодларига қайси технологиялар татбиқ этилишини ҳал қилади.

Аввал Россия Украинага бостириб кирганидан кейин «Мегафон» ва яна бир Россия оператори «Ростелеком» интернет-трафик алмашинуви London LINX (London Internet Exchange) нуқтасидан узиб қўйилганди.

Эслатиб ўтамиз, Россия 24 февралда Украинада махсус ҳарбий операцияларни бошлаган. Шундан кейин АҚШ, ЕИ, Буюк Британия, Австралия, Янги Зеландия, Япония, Канада ва бошқа давлатлар Россияга нисбатан санкциялар қўлланилганини эълон қилган. Уруш бошланганидан бери россиялик бизнесменлар, топ-менежерлар, сиёсатчилар ва амалдорларга нисбатан бир қатор тақиқ ҳамда чеклов пакетлари жорий этилган.