Шавкат Мирзиёев 24 март куни биринчи Тошкент халқаро инвестиция форуми доирасида мамлакатда бўлиб турган Саудия Арабистони инвестициялар вазири Холид ал-Фалиҳ бошчилигидаги делегацияни қабул қилди. Бу ҳақда Президент ахборот хизмати хабар қилди.
Қайд этилишича, Холид ал-Фалиҳ президентга самимий қабул учун миннатдорлик билдириб, Саудия Арабистони подшоҳи Салмон Ол-Сауд ва валиаҳд шаҳзодаси Муҳаммад Ол-Сауднинг саломи ва эзгу тилакларини етказган. Суҳбат чоғида кўп қиррали Ўзбекистон—Саудия муносабатларини ривожлантириш масалалари кўриб чиқилган.
Давлат раҳбари икки томонлама ҳамкорлик жадал ривожланиб бораётгани, йирик инвестиция лойиҳалари, энг аввало, энергетика соҳасида илгари сурилаётганини юқори баҳолаган. ACWA Power корпорацияси мамлакатнинг турли ҳудудларида энергетика инфратузилмасини модернизация қилиш ва «яшил» энергетикани ривожлантириш бўйича умумий қиймати 2,7 миллиард долларлик лойиҳаларни илгари суришга ҳисса қўшаётгани алоҳида қайд этилган.
Бундан ташқари, Саудия тараққиёт фонди иштирокида ижтимоий аҳамиятга эга қатор лойиҳалар амалга оширилмоқда. «Йўл харитаси» асосида нефть-газ, газ-кимё ва кимё тармоқлари, тоғ-кон саноати, қишлоқ хўжалиги, соғлиқни сақлаш ва фармацевтика ҳамда бошқа устувор йўналишларда истиқболли инвестиция лойиҳаларини тайёрлаш ва амалга оширишга алоҳида эътибор қаратилган.
Шавкат Мирзиёев, шунингдек, Тошкент халқаро инвестиция форуми доирасида Бирлашган Араб Амирликлари энергетика ва инфратузилма вазири Суҳайл ал-Мазруий бошчилигидаги делегацияни қабул қилди. Учрашув аввалида юқори даражадаги меҳмон БАА президенти Шайх Халифа ол-Наҳаён, Абу-Даби амирлиги валиаҳд шаҳзодаси, БАА Қуролли кучлар олий бош қўмондони ўринбосари Шайх Муҳаммад ол-Наҳаён ва мамлакат бош вазири, Дубай амири Муҳаммад ал-Мактумнинг саломи ва эзгу тилакларини етказган.
Вазир хорижий бизнеснинг мамлакатга бўлган катта қизиқишини яна бир бор тасдиқлаган. Тошкент форумининг муваффақиятли ўтказилгани билан табриклаган. Учрашувда амалий ҳамкорликни, энг аввало, савдо, инвестициялар, инновациялар, қишлоқ хўжалиги, инфратузилма, логистика ва транспорт соҳаларида олий даражада эришилган келишувларга мувофиқ кенгайтириш истиқболлари муҳокама қилинган.
«Яшил» энергетика соҳасидаги ҳамкорлик натижалари юқори баҳоланган. Masdar компанияси мамлакат ҳудудларида фотоэлектрик ва шамол электр станцияларини қуриш бўйича қатор йирик лойиҳаларни амалга оширмоқда.
Инвестицион ҳамкорликни кенгайтириш ва устувор тармоқларда янги истиқболли лойиҳаларни амалга ошириш учун катта салоҳият мавжудлиги қайд этилган.
Изоҳ (0)