Shavkat Mirziyoyev 24-mart kuni birinchi Toshkent xalqaro investitsiya forumi doirasida mamlakatda bo‘lib turgan Saudiya Arabistoni investitsiyalar vaziri Xolid al-Falih boshchiligidagi delegatsiyani qabul qildi. Bu haqda Prezident axborot xizmati xabar qildi.
Qayd etilishicha, Xolid al-Falih prezidentga samimiy qabul uchun minnatdorlik bildirib, Saudiya Arabistoni podshohi Salmon Ol-Saud va valiahd shahzodasi Muhammad Ol-Saudning salomi va ezgu tilaklarini yetkazgan. Suhbat chog‘ida ko‘p qirrali O‘zbekiston—Saudiya munosabatlarini rivojlantirish masalalari ko‘rib chiqilgan.
Davlat rahbari ikki tomonlama hamkorlik jadal rivojlanib borayotgani, yirik investitsiya loyihalari, eng avvalo, energetika sohasida ilgari surilayotganini yuqori baholagan. ACWA Power korporatsiyasi mamlakatning turli hududlarida energetika infratuzilmasini modernizatsiya qilish va “yashil” energetikani rivojlantirish bo‘yicha umumiy qiymati 2,7 milliard dollarlik loyihalarni ilgari surishga hissa qo‘shayotgani alohida qayd etilgan.
Bundan tashqari, Saudiya taraqqiyot fondi ishtirokida ijtimoiy ahamiyatga ega qator loyihalar amalga oshirilmoqda. “Yo‘l xaritasi” asosida neft-gaz, gaz-kimyo va kimyo tarmoqlari, tog‘-kon sanoati, qishloq xo‘jaligi, sog‘liqni saqlash va farmatsevtika hamda boshqa ustuvor yo‘nalishlarda istiqbolli investitsiya loyihalarini tayyorlash va amalga oshirishga alohida e’tibor qaratilgan.
Shavkat Mirziyoyev, shuningdek, Toshkent xalqaro investitsiya forumi doirasida Birlashgan Arab Amirliklari energetika va infratuzilma vaziri Suhayl al-Mazruiy boshchiligidagi delegatsiyani qabul qildi. Uchrashuv avvalida yuqori darajadagi mehmon BAA prezidenti Shayx Xalifa ol-Nahayon, Abu-Dabi amirligi valiahd shahzodasi, BAA Qurolli kuchlar oliy bosh qo‘mondoni o‘rinbosari Shayx Muhammad ol-Nahayon va mamlakat bosh vaziri, Dubay amiri Muhammad al-Maktumning salomi va ezgu tilaklarini yetkazgan.
Vazir xorijiy biznesning mamlakatga bo‘lgan katta qiziqishini yana bir bor tasdiqlagan. Toshkent forumining muvaffaqiyatli o‘tkazilgani bilan tabriklagan. Uchrashuvda amaliy hamkorlikni, eng avvalo, savdo, investitsiyalar, innovatsiyalar, qishloq xo‘jaligi, infratuzilma, logistika va transport sohalarida oliy darajada erishilgan kelishuvlarga muvofiq kengaytirish istiqbollari muhokama qilingan.
“Yashil” energetika sohasidagi hamkorlik natijalari yuqori baholangan. Masdar kompaniyasi mamlakat hududlarida fotoelektrik va shamol elektr stansiyalarini qurish bo‘yicha qator yirik loyihalarni amalga oshirmoqda.
Investitsion hamkorlikni kengaytirish va ustuvor tarmoqlarda yangi istiqbolli loyihalarni amalga oshirish uchun katta salohiyat mavjudligi qayd etilgan.
Izoh (0)