Ижтимоий тармоқларда бир йигитнинг тўхтаб турган ЙПХ автомобили устидан юриб ўтгани тасвирланган видео тарқалди. ИИВ ЙҲХББ ҳолатга муносабат билдириб, ҳуқуқбузар йигитнинг шахсига аниқлик киритилганини маълум қилди.
Маълум қилинишича, 25 январь куни соат 15:00 ларда Қўнғирот тумани, Ипак йўли кўчасида кўринишидан вояга етмаган бола йўл ҳаракати хавфсизлиги бошқармасига тегишли бўлган, тўхтаб турган Lacetti махсус хизмат автомобилининг устига чиққан. Унинг мазкур хатти-ҳаракатлари дўсти томонидан тасвирга олинган ва у ижтимоий тармоқда тарқатилган.
Ҳолат юзасидан суриштирув олиб борилганда, мазкур ҳуқуқбузарликни вояга етмаган, 17 ёшли Б.Т. содир қилгани аниқланган. Ҳудудий профилактика инспектори томонидан тўпланган ҳужжатлар вояга етмаганлар ишлари бўйича туман идоралараро комиссияси томонидан ўрганилиб, ушбу вояга етмаган боланинг отаси Ж.Т.га нисбатан Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) биринчи қисми тартибида БҲМнинг бир баравари миқдорида (270 минг сўм) жарима жазоси белгиланган.
Аввалроқ Самарқандда ЙПХ инспекторига қўл кўтарган шахсга нисбатан жиноят иши қўзғатилиб, қамоққа олингани, Тошкентда ЙПХ ходимларига сохта ҳужжат кўрсатиб, ўзини прокурор деб таништириб юрган Malibu ҳайдовчиси ушлангани, Қорақалпоғистон ЙҲХБ бошлиғи ўз ходимларини ҳақоратлаб, ургани тўғрисида хабар берилганди.
Изоҳ (0)