Молия вазири Тимур Ишметов Марказий банк ставкаси оширилганига қарамай, таълим ва ипотека кредитлари фоз ставкалари йил охиригача ўзгаришсиз қолишини маълум қилди.
Қайд этилишича, президент макроиқтисодий барқарорликни таъминлаш бўйича топшириқлар берган. Жумладан, Марказий банкнинг асосий ставкани 14 фоиздан 17 фоизга ўзгартириши ташқи омил таъсирида вақтинчалик чора сифатида кўрилмоқда.
«Иккита йирик дастур — ипотека ва таълим кредити бор. Бу ресурслар давлат бюджетидан банкларга ажратилади. Ҳамма кредитлар уч фоизга ошиши керак эди. Лекин йил охиригача ушбу кредитлар бўйича фоиз ставкаси оширилмайди», — дейди Ишметов.
Аввалроқ Марказий банк раиси Мамаризо Нурмуратов асосий ставканинг оширилишининг жорий кредитларга таъсири шартномада белгиланган шартлар асосида бўлишини айтганди. «Банклар ва мижозлар ўртасида тузилган ўзгарувчан фоиз ставкали, хусусан, Марказий банк асосий ставкасига боғланган ҳолда тузилган фоиз ставкалари шартномаларга таъсири эса ушбу шартномада келишилган шартлар ёки кредит ажратиш бўйича тегишли низом талабларига мувофиқ бўлади», — деган у.
Изоҳ (0)