Инвестициялар ва ташқи савдо вазирлигида тадбиркорларни қўллаб-қувватлаш бўйича штабига бугунги кунга қадар 1150 дан ортиқ мурожаатлар келиб тушган. Бу ҳақда Инвестициялар ва ташқи савдо вазирининг биринчи ўринбосари Азиз Воитов журналистларга берган интервьюсида маълум қилди, деб хабар бермоқда «Дарё» мухбири.
Унинг сўзларига кўра, давлат раҳбари бошчилигида барча вазирлик-идоралар, иқтисодиёт комплексидаги ташкилотлар билан биргаликда ҳозирги вазиятдан келиб чиқиб иқтисодиётнинг ўсишини таъминлаш, ялпи ички даромадни, аҳоли даромадларини ошириш ва тадбиркорлик муҳитини қўллаб-қувватлаш бўйича доимий тарзда йиғилишлар ўтказилмоқда.
Мазкур йиғилишларда асосий муҳокама қилинаётган мавзулар — тадбиркорлар томонидан таклиф этилаётган ёки муаммоси кўтарилиб, тизимли равишда ташкил қилинаётган масалалар ўрганиб чиқилмоқда. Жумладан, Инвестициялар ва ташқи савдо вазирлигида барча вазирлик-идоралар ходимларидан иборат «Тадбикорларни қўллаб-қувватлаш штаби» ташкил этилган. Савдо-саноат палатаси билан биргаликда 24 соат ишлайдиган Call-марказлар ташкил қилинган ва тадбикорлар томонидан ҳозирги вазиятдан келиб чиқиб, уларни қийнаган масалалар, муаммолар, таклифлар ва тизимли ечимлар бўйича мурожаатлар келиб тушяпти. Ҳозирги кунга қадар 1150 дан ортиқ мурожаатлар келиб тушган, уларнинг 305 тадан ортиғи ижобий ҳал этилган.Мурожаат қилинаётган масалаларга тўхталсак, хорижий ҳамкор топишда ёки импорт хом ашёсини олиб келишдаги муаммолар, бундан ташқари, экспорт бозорларини топиш, кредит муддатини узайтириш каби мурожаатлар келиб тушяпти. Шуни айтиш керакки, тадбиркорлардан келиб тушган мурожаатларни барча вазирлик-идоралар билан биргаликда ечимини топиб, бу борада бирга ишлаяпмиз ва тизимли таклифларни давлатимиз раҳбарига беряпмиз. У ерда барча масалалар қўллаб-қувватланяпти, жумладан, транспорт харажатлари масаласида. Ҳозир баъзи тадбиркорларимиз экспортга чиқаётганда транспорт-логистика харажатлари ошяпти, яъни улар бошқа транспорт коридорлардан фойдаланяпти. Харажатларни камайтиш мақсадида тадбиркорларнинг транспорт харажатларини 70 фоизгача қоплаш бўйича топшириқ берилди. Ҳозирда бу борадаги қарор лойиҳаси бўйича ишлаяпмиз. Бундан ташқари, Каспий денгизидаги юк ташишларидаги харажатларни 50 фоизгача камайтириш бўйича бошқа мамлакатлар билан келишиб олинди. Шунингдек, Озарбайжон, Бокудан келадиган юклар бўйича 30 фоизгача чегирмалар олиш учун ҳамкор давлатлар билан келишиб олинди.
Қўшимча равишда бошқа транспорт коридорлари бўйича иш олиб бориляпти. Жумладан, 16 март куни Мумбай портидан Ҳиндистон—Покистон—Афғонистон—Ўзбекистон йўналишида илк карвон — шакар маҳсулотлари кириб келиши йўлга қўйилди. Давлат раҳбари бошчилигида бўлиб ўтган йиғилишда ички темир йўл транспорт харажатларини қисқартириш бўйича чора-тадбир амалга ошириш топшириғи берилди. Бундан ташқари, тадбиркорларнинг мавжуд хорижий валютадаги кредитларини фоиз юкини оширмаслик ҳаракатларини кўриш ҳамда имтиёзли кредитлаш бўйича топшириқ берилди».
Изоҳ (0)