AQSH Rossiyaga qarshi iqtisodiy sanksiyalarini yanada kengaytiradi. Bu haqda Oq uyning Milliy iqtisodiy kengash direktori o‘rinbosari Dalip Singx CBS’ga bergan intervyusida ma’lum qildi.
“Biz o‘z sanksiyalarimizni kengaytirishimiz mumkin. Allaqachon kiritgan chora-tadbirlar, sanksiyalarimiz ularning ta’sirini yanada kengaytirib, ko‘proq maqsadlarni qamrab oladi. Ularni yanayam ko‘proq sektorlarga qo‘llaymiz”, — deydi Singx.
Uning aniqlik kiritishicha, bu masalan, sanksiyalar ro‘yxatiga ko‘proq banklar kiritilishini anglatadi. Singxning qo‘shimcha qilishicha, yangi cheklovlar joriy etilsa, Rossiyaning asosiy iqtisodiy sektoriga, xususan, neft va gaz tarmog‘iga ta’sir ko‘rsatadi.
AQSH Rossiyaga qarshi qator sanksiyalar paketlarini kiritgan. “VTB” va uning 20 ta sho‘basi, “Otkritiye”, “Sovkombank” va “Novikombank” eng qattiq blokirovka qiluvchi sanksiyalar ostida qoldi. Ularning Amerika yurisdiksiyasidagi aktivlari va AQSH dollaridagi hisoblari bloklangan. “Sberbank” va uning 25 ta sho‘ba tashkiloti ham sanksiyalarga uchragan.
Bundan tashqari, Rossiyaga mudofaa, aerokosmik va kemasozlik sanoati uchun yarim o‘tkazgichlar, kompyuterlar, lazerlar, axborot xavfsizligi uskunalari va sensorlar eksportiga ham cheklovlar kiritilgan. Rossiyadan import qilinadigan ayrim tovarlar, jumladan, dengiz mahsulotlari, aroq, brilliantlar ham sanksiyaga uchragan. Vashington Rossiyaga avtomobillar, kiyim-kechak, zargarlik buyumlarini olib kirishni taqiqlagan.
Shuningdek, Rossiya mudofaa vaziri Sergey Shoygu, tashqi ishlar vaziri Sergey Lavrov va Bosh shtab boshlig‘i Valeriy Gerasimovga qarshi ham cheklovlar joriy etilgan. Bundan tashqari, AQSH Davlat departamenti Sergey Shoygu va Valeriy Gerasimovga qarshi o‘z sanksiyalarini ham joriy etgan. Davlat departamenti ularni “Ukrainaga nisbatan yangi bosqinda” javobgar deb hisoblaydi. Davlat departamenti yo‘nalishi bo‘yicha sanksiyalar ularning AQSHga kirishini taqiqlaydi.
Izoh (0)