Sambo bo‘yicha jahon chempioni 29 yoshli Kamoliddin Rasulovni o‘ldirgan sportchi Shuhrat To‘raboyev Jinoyat ishlari bo‘yicha Uchtepa tuman sudi hukmiga ko‘ra 15 yilga qamaldi. Marhumning opasi Maftuna Rasulova ukasini o‘ldirgan sportchi yetarli darajada jazolanmayotganini aytmoqda.
“Ukam Kamoliddin Rasulov 2021-yilning 13-sentabr kuni Uchtepa tumanida vahshiy qotil — Shuhrat To‘raboyev tomonidan xotinining ko‘z o‘ngida o‘ldirildi. Kamoliddin sport bilan shug‘ullanishi barobarida Davlat xavfsizlik xizmati xodimi sifatida ham faoliyat yuritardi. Ko‘p marotaba O‘zbekiston bayrog‘ini jahon arenalarida yuqori ko‘tarib, Vatani sha’nini munosib himoya qilib kelayotgandi. Ukam uyushgan guruh tomonidan o‘ldirildi. Buni biz o‘sha kuni voqea yozib olingan kuzatuv kameralaridan, guvohlar gapidan bildik. Sud esa bir nafar jinoyatchiga 15 yil ozodlikdan mahrum qilish jazosini tayinlab, jinoyatchilarning yetarlicha jazolanmasligiga sabab bo‘lmoqda”, — deydi marhum sportchining opasi Maftuna Rasulova.
Marhumning opasi Jinoyat ishlari bo‘yicha Uchtepa tuman sudi adolatli hukm o‘qib, begunoh insonni o‘ldirgan kishi qanday jazolanishini ko‘rsatib qo‘yishi kerak ekanligini, biroq sud qotillikka adolatli baho bermaganini aytmoqda.
“Biz sud tergovidan norozimiz. Sababi kuzatuv kameralarida pichoqlangan ukamni quvlaganlar ikki kishi ekani, qotilning yonida yugurayotgan shaxs akasiman deya o‘zini tanishtirgan Y.T. emas, aslida qotilning sherigi ekani aytilyapti. Va videodagi kishi va sudda guvohlik bergan akani solishtirib ko‘rganimizda, ular umuman boshqa-boshqa odamlar ekani ko‘rinyapti. Ammo sud bunga e’tibor qaratmadi. Nusratillo ismli guvohni ham sud tergoviga olib kelmadi. Ular guvohni chaqirdik, ammo kelmadi, kelmasa nima har derdik, deya cheklanyapti. Nega sud guvohni sud zaliga chaqirib ololmayapti. Shumi davlatimizning qonuni? Shumi sudning adolati?”, — deya e’tiroz bildirmoqda marhumning opasi.
“Daryo” sud tergoviga kelmagan Nusratillo ismli guvohning prokuratura tergovida aytgan ko‘rsatmalari bilan tanishdi.
“2021-yilning 13-sentabr kuni kechki payt taxminan soat 21:00 da onam bilan telefon orqali gaplashib turgandim. Mendan 50-100 metr uzoqlikda ikki kishi o‘zaro suhbatlashib, tortishib qoldi. Shunda sport kiyimidagi bo‘yi uzun yigit oshxona pichog‘i bilan sherigini jarohatladi. Pichoqdan jarohatlangan yigit esa biroz qochib, sal nariroqqa ketdi. Pichoq ko‘targan yigit esa uning ortidan yetib olib, yelkasidan ushlab, uning qorin sohasiga yana ikki marta pichoq urdi. Pichoqdan jarohatlangan yigit baqirib, hammadan yordam so‘radi. Shu payt men ularning oldiga yugurib bordim. Shunda pichoq ko‘targan yigit aralashmasligimni aytib, ket yo‘qol, deya baqirdi. Men sal ortga qaytganimni ko‘rgach, qo‘lidagi pichoqni yana yaralangan sherigining qorniga tiqdi. Bu safar pichoq oxirigacha kirdi. Pichoqdan yaralangan yigit yanayam qattiq baqirib, yordam so‘radi va qocha boshladi. Pichoq ko‘targan yigit esa yana uni quvlamoqchi bo‘lib turganida, menga keyinchalik tanish bo‘lgan uning akasi kelib, pichoq ko‘tarib olgan ukasini to‘xtatdi. Shunda sherigini pichoqlagan yigit bu lahzani olti oydan beri kutib yurganini aytdi va voqea joyidan qocha boshladi. Men esa uning ortidan quvib, uni oyog‘iga chalib, yiqitdim. Qochmasligini, bo‘lar ish bo‘lganini, endi qilgan ishiga javob ham berishi kerakligini aytdim”, — degan prokuratura tergovidagi savollarga javob bergan guvoh.
Tergov hujjatlarida yozilishicha, sportchini o‘ldirgan Shuhrat To‘raboyev dastlabki ko‘rsatmasida Kamoliddin Rasulovni o‘ldirishni niyat qilganini, shu maqsadda uni izlaganini, 2021-yilning 13-sentabr kuni ham soat 14:00 dan boshlab uning iziga tushib, soat 21:30 da topgach, o‘ldirganini bayon qilgan.
“Qotillik kelinimizning ko‘z o‘ngida sodir bo‘ldi. Shu voqea sabab kelinimiz ancha paytgacha shok holatida yurdi. Bu esa jinoyatni og‘irlashtiruvchi holat sifatida baholanishi kerak edi. Qolaversa, bu qotil avval ham sudning qora kursisiga o‘tirgan. Xulosa chiqarmagan. Bu safar ham u qotillik qilganidan, begunoh insonni o‘ldirganidan afsuslanmayapti. Buni sud yakunida so‘nggi so‘zida ham aytmadi. Hatto gapirmadi ham. Demak, bu 15 yillik jazoni katta taxmin bilan yana 5-6 yil o‘tab chiqib keladi va yana qotilliklar qiladi”, — deydi Maftuna Rasulova.
Kamoliddin Rasulov o‘limida aybli deb topilib, 15 yil muddatga qamalgan Shuhrat To‘raboyevning yaqinlari “Daryo” muxbiri bilan suhbatda ayni damda tushkun holatdaligini, Shuhrat To‘raboyevning aybida ularning ishtiroki yo‘qligini, biroq buni tushunmagan marhumning yaqinlari ularni haqorat qilishdan to‘xtamayotganini aytmoqda.
Eslatib o‘tamiz, sambo bo‘yicha jahon chempioni 29 yoshli Kamoliddin Rasulov 2021-yilning 13-sentyabr kuni soat 21:30 da Toshkent shahrining Uchtepa tumanidagi ko‘p qavatli uylar oldida boshqa bir sportchi tomonidan pichoqlab o‘ldirilgandi. Bosh prokuratura axborot xizmatining rasmiy ma’lumotida chempion yigitning pichoqlanishiga uning gumonlanuvchi tanishiga «Humo Trop» vitaminini tavsiya qilgani, oqibatda esa gumonlanuvchining sog‘lig‘i yomonlashgani, shifokorlar bu kasallikning davosi yo‘qligini bildirgani xabar berilgandi. Jinoyat ishlari bo‘yicha Uchtepa tuman sudi mazkur qotillik voqeasini 2022-yilning 8-fevral kunidan boshlab ko‘ra boshladi. Mazkur sudda so‘z olgan Shuhrat To‘raboyev marhum Kamoliddin Rasulov tavsiya qilgan vitaminni aytilgan miqdordan ko‘ra ko‘proq iste’mol qilgani sabab sog‘lig‘i yomonlashganini, kechalari issig‘i chiqib, uxlolmaydigan bo‘lib qolganini aytdi. Marhumning xotini Gulnoza Xolmurodova esa qotillik uning ko‘z o‘ngida sodir bo‘lganini, qotillik sodir bo‘lgan paytda hammadan yordam so‘rab, chaqirganini ammo hech kim, hatto PPX xodimlari ham unga yordam bermaganini aytgandi. Sudda so‘z olgan yana bir guvoh A.Q. “Humo Trop” vitamini haqida gap ochib, tanishi Shuhrat To‘raboyevning sog‘lig‘i shu vitamin sabab yomonlashganini bildirdi. PPX xodimlari esa voqea joyiga yetib borganida Shuhrat To‘raboyev ulardan qochib, ko‘p qavatli uy podezdiga yashiringanini ma’lum qilgandi.
Izoh (0)