Турин политехника университетининг 18 ёшли талабасини уриб, ўлдириб қўйган йигит 8 йилга озодликдан маҳрум этилди

Тошкент шаҳрида 25 ноябрь куни Турин политехника университети дарвозаси ёнида 18 ёшли икки йигит ўртасидаги жанжал оқибатида бир талаба ҳалок бўлганди. Кейинроқ шаҳар ички ишлар бош бошқармаси ҳолат акс этган видеони эълон қилганди.

Ҳолат 25 ноябрь куни 12:30 атрофида содир бўлган. Турин политехника университети ҳовлисида Суннат ва Муҳаммадазиз исмли йигитлар кўришиб ўзаро ярашиш мақсадида қўл беришган пайти шу университет талабаси Самандар уларнинг олдига келган ва «Бўлдими, ярашиб олдингларми? Чиройли ҳал қилинглар» — деган. Шу пайт жабрланувчи (2003 йилда Андижон шаҳрида туғилган) 1-босқич талабаси Шерзод исмли йигит Самандарнинг олдига келиб «Нима қиласиз аралашиб?», деган.

Шу орада Самандарнинг ёшликдан бирга ўсган Аббос ва Алимбек исмли дўстлари келиб қолган ва Аббос Шерзоднинг юзига бир мушт уриб, ерга йиқитган. Оқибатда у воқеа жойида ҳалок бўлган.

Суд-тиббий экспертизасининг бирламчи маълумотига асосан, Шерзоднинг ўлимига бош мия ёпиқ жароҳати, мия ости пардалари ва мия тўқималарига қон қуйилиши жароҳати сабаб бўлган.

Гумонланувчига нисбатан Жиноят кодексининг 104-моддаси 3-қисми «д» банди (одам ўлимига сабаб бўлувчи қасддан баданга оғир шикаст етказиш) билан жиноят иши қўзғатилганди. Ушбу жиноий иш судда кўриб чиқилди.

Аниқланишича, суд мажлисида судланувчи аввал Жиноят кодексининг 169-моддаси (ўғрилик) билан жиноий жавобгарликка тортилгани очиқланди.

«Шунақа фалокат бўлди. Ёш йигит эрта оламдан ўтди. Мен қамоқда ўтирибман.

Агар шу ёққа бориб қолмаганимда ва жанжалга аралашмаганимда, у бола мени сўкмасди, мен ҳам у болани урмасдим. У бола катта бўлиб, ота-онасини Ҳажга олиб бориши мумкин эди. Мен 5 ёки 10 йилда озодликка чиқиб, ота-онамнинг бағрига қайтиб келарман, лекин у бола энди қайтиб келмайди.

Мен кучли зарба бериш ёки зарба бериб нимадир қилиш мақсадида у ерга бормагандим. У болани танимаганман, шу пайтгача уришиб ё қасдлашиб юрган жойим йўқ. Ўзимни ушлаб қололмадим. Ёшлик қилиб қўйдим», — дейди айбланувчи.

Айбланувчи Жиноят кодексининг 104-моддаси (одам ўлимига сабаб бўлган қасддан баданга оғир шикаст етказиш) 3-қисми «д» бандида назарда тутилган жиноятни содир қилганликда айбли деб топилиб, 8 йил муддатга озодликдан маҳрум қилинди.