Олий Мажлис Сенатининг 19 март куни бўлиб ўтган навбатдаги ялпи мажлисида 2021 йилда тазйиққа учраган хотин-қизларнинг 39 минг 343 нафарига ҳимоя ордери берилгани айтиб ўтилди, дея хабар бермоқда «Дарё» мухбири.
Мажлисда ички ишлар вазири Пўлат Бобожонов сенаторларга берган ахборотида зўравонликка учраётган аёллар ва уларга берилаётган ҳимоя ордерлари ҳақида маълумот берди. Сенат раиси Танзила Норбоева мазкур ҳолат юзасидан ўз муносабатини билдирди.
«Аёлларга 2020 йилда ҳимоя ордери кам берилганди. Сабаби уларнинг билим даражаси паст бўлган. Ўтган йили тарғибот ишлари яхши бўлгани туфайли аёллар ҳимоя ордерини бемалол олишга муваффақ бўлишяпти. Аммо гап шундаки, улар ҳимоя ордерини олади, лекин бу масала билан тўлиқ ишланмаяпти. Аёлга эътибор бериляпти — у билан психолог ишлайди ёки тиббий ёрдам кўрсатилади. Лекин зўравонлик қилган шахс четда қолмоқда. Масалан, алкоголли ичимлик истеъмол қилган ва аёлига шикаст етказган шахсни олайлик. Аёл реабилитация марказига ётқизилади, лекин зўравон кимса билан соғлиқни сақлаш тизими ишламаяпти. Ёки бўлмаса, ишсиз бўлган фуқаро ҳар куни асабийлашиб, уйдаги аёлига қаттиқ тегиб, хафа қиляпти. Оқибатда аёл ҳимоя ордери олиб чиқиб кетяпти. Эркак ишсизлигича ўтирибди. Бандлик хизмати ўша ерда уни ўқитиб ишга жойламаяпти. Тезкор чоралар кўрмаяпти. У билан ишламаяпти. Ёки зўравонлик қилган одамнинг руҳий ҳолати чатоқ. Психологлар ўша зўравон билан шуғулланмаяпти. Масалага комплекс ёндашиб, биргаликда ҳаракат қилинмас экан, лоқайдлик ҳолатлари давом этаверади. Шунинг учун бошқа ташкилотлар билан ҳамкорликни кучайтиришимиз керак», — деди Сенат раиси.
Мавзуга доир: «Ўзбекистон шароитида аёлга қўл кўтариш, тазйиқ ўтказиш ман этилади деган қарорни қилинглар» – Шавкат Мирзиёев
«Зулайҳо Баҳриддиновна, сизга бекорга бош вазир ўринбосари деган мақом берилмаган. Мана шу тизимларни сиз қаттиқ текширишингиз керак. Бу фақат ички ишларнинг иши эмас. Ҳимоя ордерларини бериш, аёлларнинг ҳуқуқий билимини ошириш, уларга ҳуқуқий ёрдам бериш бўйича ички ишлар яхши ишлади. Лекин бу билан иш битмайди. Айтганимдек, аёл билан ҳам, зўравон билан ҳам мукаммал шуғулланиш керак. Бизда, афсуски, зўравонлар билан мукаммал шуғулланиш талаб даражасида эмас. Шунинг учун сизнинг кучингиз ва салоҳиятингиз етади. Президентимиз томонидан бош вазир ўринбосари мақоми берилдики, шу масалада талабларни қаттиқ-қаттиқ қўйишингиз керак бўлади. Соғлиқни сақлаш, Халқ таълими, Бандлик вазирликлари ва умуман олганда, бу ҳамманинг вазифаси бўлиши керак», — деди Сенат раҳбари.
Эслатиб ўтамиз, 2020 йилда хотин-қизларни тазйиқ ва зўравонликдан ҳисмоя қилиш бўйича президент қарори қабул қилинган. Ҳужжатга асосан, тазйиқ ва зўравонликдан жабрланган аёлларга ҳимоя ордери бериш тартиби тасдиқланган. Шунигдек, хотин-қизларга гап отганларни жавобгарликка тортиш таклиф қилинган эди
Изоҳ (0)