Кучли ёғингарчиликларнинг олдини олиш мақсадида фуқаро ФВВга телефон қилиб, осмонга ракета учириб, булутларни ҳайдаб беришни сўрагани ҳақида аудиохабар ижтимоий тармоқларда тарқалганди. «Ўзгидромет» тарқалган хабарга муносабат билдирди.
Марказ маълумотида айтилишича, булутларга фаол таъсир қилиш дастурларида ҳар бир аниқ ҳудуддаги метеорологик жараёнларнинг интенсивлигини ҳисобга олиш зарур. Булутларга фаол таъсир қилиш бўйича ишлар кучли ёғингарчилик даврлари ёки кўп миқдорда ёғингарчилик бўлган даврларда мутлақо олиб борилмайди, чунки бу иқтисодий фаолиятга зарар етказиши мумкин.
«Шундан келиб чиққан ҳолда, Ўзбекистонда сўнгги кунларда кузатилган кучли ёмғирли ҳодисалар туфайли булутларга зарба бериш мутлақо тақиқланган. Мутахассисларнинг фикрича, бу булутлар жуда ҳам катта массага эга. Бундай булутларга фаол таъсир кўрсатилса, яна ҳам кўп ёмғир ёғиб, катта талафотлар рўй бериши мумкин», — дейилади «Ўзгидромет» хабарида.
Наманган вилояти ФВБ матбуот хизматининг маълум қилишича, юқоридаги қўнғироқ 16 март куни Наманган шаҳар Фавқулодда вазиятлар бўлими масъул ходими томонидан ўрганилган. Ўрганиш натижаларидан аниқланишича, юқоридаги мурожаатдаги хонадонларда сув босиш ҳолати юз бермаган, балки кўчадаги йўлнинг емирилиши кузатилган. Телефон орқали мурожаат қилган фуқаронинг у ерда ер участкаси бўлиб, ҳеч қандай хонадонига зарар етмаган, фуқаро бу соҳага тушунмагани ва обрўсизлантириш мақсадида бўлмаганини айтиб ўтган.
Изоҳ (0)