Тошкент шаҳрида 23 нафар аёл эрида қолган фарзандлари учун алимент тўлаб келмоқда. Бу ҳақда Мажбурий ижро бюросининг Тошкент шаҳар бошқармаси инспектори Дилмурод Эргашев «Дарё» мухбири Мусулмонбек Иброҳимовга берган қисқача интервьюсида айтиб ўтди.
Дилмурод Эргашевнинг айтишича, алимент тўловлари бўйича қарздорлиги бор аёллар билан ундирувни амалга ошириш энг қийин масала ҳисобланади.
«Аёлларнинг асосий қисми ишсиз бўлгани учун алимент ундириш мураккаб. Қоидага кўра, 1 нафар фарзанд учун 800 минг сўмдан ортиқ пул тўлаш керак. Агар болалар сони 3 нафар бўлса, 2 миллион сўмдан ортиқ пул тўлашга тўғри келади. Тайинки, ишсиз аёл учун бу миқдордаги пулни тўлаш имконсиз», — деди суҳбатда МИБ ходими.
Инспекторнинг таъкидлашича, айрим ҳолларда эркак аёлни алиментни тўламаётгани устидан шикоят қилади.
«Аксар эркаклар бола менда, алиментимни ундириб беринглар, деб мурожаат билан келишади. Албатта, бу уларнинг қонуний ҳуқуқи. Лекин кўпинча аёлнинг шароитини ўрганганимизда имконияти йўқлигини кўрамиз. Шунда аёлингизга жабр қилманг, деган асосий масала кўтарилади. Аммо баъзида эркаклар оёғини тираб туриб олади. Бунда қонунларда белгиланган чораларни кўришга тўғри келади. Масалани судга чиқарамиз. Суд жараёнида ҳам яраштиришга уриниб кўрилган ёки аёлга жабр қилмаслик тўғрисида айтилган пайтлар бўлган. Афсуски, эрининг норозилиги сабабли аёлга нисбатан 15 суткалик маъмурий қамоқ қўлланган ҳолатлар ҳам бор», —дейди Дилмурод Эргашев.
Эргашев сўзида давом этар экан, ҳақиқатан ҳам аёлларда тўлов қобилияти бўлмаса ва ишга яроқсиз бўлса, аёлларга ижтимоий ёрдам кўрсатиш тизимини йўлга қўйиш кераклигини таклиф қилди.
«Масалан, қарздорлиги бор аёлларни иш билан таъминлаш ёки қандайдир қарзини ёпиш бўйича ижтимоий ёрдам кўрсатилса, жуда яхши бўлар эди. Турмушдан ажралган аёллар маҳаллаларда ‘темир дафтаръга киритилади. Лекин у ёрдам пули алиментга етмайди. 15 суткалик маъмурий қамоқ аёллар борадиган жой эмас, деб ҳисоблайман», — деди инспектор.
Изоҳ (0)