O‘zbekistonda bir nechta banklarda 18-mart kuni dollar kursi keskin yuqorilagandan keyin tushishni boshladi.
Aksariyat banklar 1 AQSH dollarini 11 500 so‘mdan sotib olishni, 11 570 so‘mdan sotishni taklif qilmoqda. Bir kun avval bu ko‘rsatkich mos ravishda 11 520 va 11 630 so‘m edi.
Bundan tashqari, Markaziy bank tomonidan rasmiy kurs oxirgi hafta ichida birinchi marta tushib 11 509 so‘mni tashkil qildi.
Markaziy bank nima qildi?
Yil boshidan beri so‘m AQSH dollariga nisbatan 6,8 foizga qadrsizlandi. Shu munosabat bilan, Markaziy bank ichki valyuta bozoridagi intervensiya hajmini oshirdi.
Ushbu operatsiyalar “neytrallik tamoyillari” asosida amalga oshiriladi – ya’ni oltin-valyuta zaxiralari hisobiga emas, balki o‘tgan yili jamg‘arilgan qo‘shimcha zaxiralar hisobiga.
Bundan tashqari, bank tizimini zaruriy likvidlik bilan ta’minlash maqsadida banklarga Markaziy bank tomonidan qisqa muddatli likvidlik (repo va svop operatsiyalari orqali) taqdim etib boriladi.
Markaziy bank tomonidan muomalaga chiqariladigan qisqa muddatli obligatsiyalar oylik o‘rtacha qoldig‘i bo‘yicha limitlar 20 trln so‘mgacha oshirildi.
Banklarga joriy yilning 1-iyuliga qadar:
- chakana operatsiyalar bo‘yicha valyuta kurslarini belgilashda valyuta birjasida Call-auksion natijasida shakllangan valyuta kursidan foydalanish imkoniyati berildi;
- tijorat banklari tomonidan auksionlarda xarid qilinadigan Markaziy bank obligatsiyalari bo‘yicha foiz stavkalari darajasi asosiy stavkaning yuqori chegarasigacha kengaytirildi;
- ikki haftalik depozit auksionlari bo‘yicha limitlar bekor qilindi.
Avvalroq Markaziy bank raisi O‘zbekistonda dollar kursi keskin oshib ketganiga izoh bergan edi.
Izoh (0)