Erkaklar aliment talab qilgani uchun 15 sutkaga qamalayotgan ayollar bor — MIB

Toshkent shahrida 23 nafar ayol erida qolgan farzandlari uchun aliment to‘lab kelmoqda. Bu haqda Majburiy ijro byurosining Toshkent shahar boshqarmasi inspektori Dilmurod Ergashev “Daryo” muxbiri Musulmonbek Ibrohimovga bergan qisqacha intervyusida aytib o‘tdi.

Dilmurod Ergashevning aytishicha, aliment to‘lovlari bo‘yicha qarzdorligi bor ayollar bilan undiruvni amalga oshirish eng qiyin masala hisoblanadi.

“Ayollarning asosiy qismi ishsiz bo‘lgani uchun aliment undirish murakkab. Qoidaga ko‘ra, 1 nafar farzand uchun 800 ming so‘mdan ortiq pul to‘lash kerak. Agar bolalar soni 3 nafar bo‘lsa, 2 million so‘mdan ortiq pul to‘lashga to‘g‘ri keladi. Tayinki, ishsiz ayol uchun bu miqdordagi pulni to‘lash imkonsiz”, — dedi suhbatda MIB xodimi.

Inspektorning ta’kidlashicha, ayrim hollarda erkak ayolni alimentni to‘lamayotgani ustidan shikoyat qiladi.

“Aksar erkaklar bola menda, alimentimni undirib beringlar, deb murojaat bilan kelishadi. Albatta, bu ularning qonuniy huquqi. Lekin ko‘pincha ayolning sharoitini o‘rganganimizda imkoniyati yo‘qligini ko‘ramiz. Shunda ayolingizga jabr qilmang, degan asosiy masala ko‘tariladi. Ammo ba’zida erkaklar oyog‘ini tirab turib oladi. Bunda qonunlarda belgilangan choralarni ko‘rishga to‘g‘ri keladi. Masalani sudga chiqaramiz. Sud jarayonida ham yarashtirishga urinib ko‘rilgan yoki ayolga jabr qilmaslik to‘g‘risida aytilgan paytlar bo‘lgan. Afsuski, erining noroziligi sababli ayolga nisbatan 15 sutkalik ma’muriy qamoq qo‘llangan holatlar ham bor”, —deydi Dilmurod Ergashev.

Ergashev so‘zida davom etar ekan, haqiqatan ham ayollarda to‘lov qobiliyati bo‘lmasa va ishga yaroqsiz bo‘lsa, ayollarga ijtimoiy yordam ko‘rsatish tizimini yo‘lga qo‘yish kerakligini taklif qildi.

“Masalan, qarzdorligi bor ayollarni ish bilan ta’minlash yoki qandaydir qarzini yopish bo‘yicha ijtimoiy yordam ko‘rsatilsa, juda yaxshi bo‘lar edi. Turmushdan ajralgan ayollar mahallalarda ‘temir daftar’ga kiritiladi. Lekin u yordam puli alimentga yetmaydi. 15 sutkalik ma’muriy qamoq ayollar boradigan joy emas, deb hisoblayman”, — dedi inspektor.