«Эҳтимол, кейинга қолдиришга тўғри келиши мумкин» — дунёдаги вазиятнинг Ўзбекистондаги йирик лойиҳаларга таъсири маълум бўлди

Марказий банк раиси Мамаризо Нурмуратов ҳозирги геосиёсий вазият Ўзбекистон иқтисодиётига таъсири ҳақида гапириб берди.

Унинг сўзларига кўра, ўтган 2021 йил жаҳон иқтисодиёти ва миллий иқтисодиёт учун ҳам пандемиядан кейин тикланиш йили бўлди.

Охирги 15-20 кунда молия бозорларида ва асосий савдо ҳамкорларда иқтисодий вазият кескин ўзгарди. Ҳозирги қисқа муддатли беқарорликлардан келиб чиқиб иқтисодиётимиз ҳақида якдил хулоса қилиш тўғри бўлмайди, — деди Мамаризо Нурмуратов.

Мамлакатда 2022—2023 йилларга мўлжалланган макроиқтисодий ва таркибий ислоҳотлар борасидаги чора-тадбирлар белгилаб олинган. Бу, ўз навбатида, ўрта ва узоқ муддатли истиқболда иқтисодиётга ташқи шокларнинг салбий оқибатларини юмшатиш имконини беради.

Албатта, ташқи шоклар жорий йилга белгиланган кўрсаткичларга ўз таъсирини кўрсатади. Вазиятнинг тез ўзгарувчанлигини ҳисобга олган ҳолда, биз ўз ҳисоб-китобларимиз ва прогнозларимизни апрель ойида эълон қиламиз, — деди Марказий банк раиси.

Мамаризо Нурмуратов сўзларига кўра, асосий савдо ҳамкорларнинг миллий валюталарининг қадрсизланиши сўмга қисқа муддатли девалвацион босимни юзага келтирмоқда.

Жумладан, пул ўтказмалари ҳажми АҚШ доллари эквивалентида камаймоқда, аҳоли ва тадбиркорларда девалвацион кутилмалар ошди.

Бундай босим муқаррар, лекин ўрта муддатли истиқболда, инқирознинг энг юқори таъсирли босқичи ўтганидан сўнг, савдо ҳамкорларнинг валюта курслари ўзининг мувозанатли қийматларига етади ва шунга мос равишда сўмнинг алмашув курсига босим ўтказишни тўхтатади, — деди Мамаризо Нурмуратов.

Анъанавий юк ташиш йўналишлари мураккаблашмоқда, бу эса яна импорт қилинадиган товарлар нархининг ошишига олиб келиши мумкин.

Бундан ташқари, Ўзбекистон импорт қиладиган нефть, металлар, дон маҳсулотлари, ўсимлик ёғи каби қатор хом ашё ва озиқ-овқат маҳсулотларининг жаҳон бозорларида нархи ошди.

Бўлиб ўтаётган воқеалар биз жойлашган ҳудудимизнинг (минтақамизнинг) инвестициявий жозибадорлигига салбий таъсир кўрсатади, — деди Марказий банк раиси.

Унинг сўзларига кўра, Ўзбекистон йирик инвестиция лойиҳаларини молиялаштириш учун янги манбаларни излашга мажбур бўладу ва бу албатта белгилаб олган таркибий ислоҳотларимизни тезроқ ва самарали амалга оширишни талаб этади.

Эҳтимол, баъзи инвестиция лойиҳаларини кейинга қолдиришга тўғри келиши мумкин, — деди Мамаризо Нурмуратов.

Аввалроқ дунёдаги вазиятнинг Ўзбекистондаги нархларга таъсири маълум бўлдгани ҳақида хабар берилган эди.