Markaziy bank raisi Mamarizo Nurmuratov hozirgi geosiyosiy vaziyat O‘zbekiston iqtisodiyotiga ta’siri haqida gapirib berdi.
Uning so‘zlariga ko‘ra, o‘tgan 2021-yil jahon iqtisodiyoti va milliy iqtisodiyot uchun ham pandemiyadan keyin tiklanish yili bo‘ldi.
Oxirgi 15-20 kunda moliya bozorlarida va asosiy savdo hamkorlarda iqtisodiy vaziyat keskin o‘zgardi. Hozirgi qisqa muddatli beqarorliklardan kelib chiqib iqtisodiyotimiz haqida yakdil xulosa qilish to‘g‘ri bo‘lmaydi, — dedi Mamarizo Nurmuratov.
Mamlakatda 2022—2023-yillarga mo‘ljallangan makroiqtisodiy va tarkibiy islohotlar borasidagi chora-tadbirlar belgilab olingan. Bu, o‘z navbatida, o‘rta va uzoq muddatli istiqbolda iqtisodiyotga tashqi shoklarning salbiy oqibatlarini yumshatish imkonini beradi.
Albatta, tashqi shoklar joriy yilga belgilangan ko‘rsatkichlarga o‘z ta’sirini ko‘rsatadi. Vaziyatning tez o‘zgaruvchanligini hisobga olgan holda, biz o‘z hisob-kitoblarimiz va prognozlarimizni aprel oyida e’lon qilamiz, — dedi Markaziy bank raisi.
Mamarizo Nurmuratov so‘zlariga ko‘ra, asosiy savdo hamkorlarning milliy valyutalarining qadrsizlanishi so‘mga qisqa muddatli devalvatsion bosimni yuzaga keltirmoqda.
Jumladan, pul o‘tkazmalari hajmi AQSh dollari ekvivalentida kamaymoqda, aholi va tadbirkorlarda devalvatsion kutilmalar oshdi.
Bunday bosim muqarrar, lekin o‘rta muddatli istiqbolda, inqirozning eng yuqori ta’sirli bosqichi o‘tganidan so‘ng, savdo hamkorlarning valyuta kurslari o‘zining muvozanatli qiymatlariga yetadi va shunga mos ravishda so‘mning almashuv kursiga bosim o‘tkazishni to‘xtatadi, — dedi Mamarizo Nurmuratov.
An’anaviy yuk tashish yo‘nalishlari murakkablashmoqda, bu esa yana import qilinadigan tovarlar narxining oshishiga olib kelishi mumkin.
Bundan tashqari, O‘zbekiston import qiladigan neft, metallar, don mahsulotlari, o‘simlik yog‘i kabi qator xomashyo va oziq-ovqat mahsulotlarining jahon bozorlarida narxi oshdi.
Bo‘lib o‘tayotgan voqealar biz joylashgan hududimizning (mintaqamizning) investitsiyaviy jozibadorligiga salbiy ta’sir ko‘rsatadi, — dedi Markaziy bank raisi.
Uning so‘zlariga ko‘ra, O‘zbekiston yirik investitsiya loyihalarini moliyalashtirish uchun yangi manbalarni izlashga majbur bo‘ladu va bu albatta belgilab olgan tarkibiy islohotlarimizni tezroq va samarali amalga oshirishni talab etadi.
Ehtimol, ba’zi investitsiya loyihalarini keyinga qoldirishga to‘g‘ri kelishi mumkin, — dedi Mamarizo Nurmuratov.
Avvalroq dunyodagi vaziyatning O‘zbekistondagi narxlarga ta’siri ma’lum bo‘ldgani haqida xabar berilgan edi.
Izoh (0)