Олий Мажлис Қонунчилик палатасининг 16 март куни ўтказилган мажлисида депутатлар сиёсий партияларнинг 2021 йилдаги фаолиятини молиялаштириш манбалари тўғрисидаги ҳисоботларини эшитди. Бу ҳақда парламент қуйи палатаси матбуот хизмати хабар берди.
Мажлисда сиёсий партияларнинг роли тобора кучайтирилиши улар фаолиятида молиявий интизомни янада мустаҳкамлашга эътибор қаратишни талаб этиши таъкидланган. «Бу эса сиёсий партиялар тасарруфига давлат бюджетидан келиб тушадиган маблағлар харажатларини тўғри режалаштириш, мақсадли сарфлашни тақозо этади», — дейилади хабарда.
«Сиёсий партияларни молиялаштириш тўғрисида»ги қонунга биноан сиёсий партия Олий Мажлиснинг Қонунчилик палатасидаги депутатлик ўринлари сонига қараб ўз устав фаолиятини молиялаштириш учун давлат томонидан молиялаштириш маблағларини олиш ҳуқуқига эга.
Олий Мажлис Қонунчилик палатаси депутати Расул Кушербаев 2021 йилда Ўзбекистондаги сиёсий партияларга давлат бюджетидан қанча маблағ ажратилганини маълум қилди.
Унга кўра, 2021 йил давомида энг кўп маблағ — 36,56 миллиард сўм ЎзЛиДеП партиясига ажратилган. Кейинги ўринда «Миллий тикланиш» демократик партияси — 25,8 миллиард сўм.
«Адолат» социал-демократик партиясига 2021 йилда давлат бюджети ҳисобидан 17 миллиард сўмдан ортиқ маблағ ажратилгани маълум бўлди.
Шунингдек, ўтган йили Халқ демократик партиясига 16,4 миллиард сўм, Экологик партия эса 12,8 миллиард сўм ажратилган.
Изоҳ (0)