Ўзбекистонда 17—24 март кунлари кутилаётган вақти-вақти билан кучли ёғингарчилик ҳамда ҳаво ҳароратининг сезиларли ўзгаришлари сабабли бир қатор ҳудудларда қор кўчиш хавфи эълон қилинди. Бу ҳақда «Ўзгидромет» хабар қилди.
Қайд этилишича, республиканинг тоғли ҳудудлари, жумладан:
- Қашқадарё вилояти: Китоб, Шаҳрисабз, Қамаши, Деҳқонобод туманларида;
- Сурхондарё вилояти: Қумқўрғон, Сариосиё, Узун, Бойсун туманларида;
- Самарқанд вилояти: Қўшработ, Нуробод, Самарқанд, Ургут, Булунғур туманларида;
- Жиззах вилояти: Зомин, Бахмал туманларида;
- Тошкент вилояти: Паркент, Оҳангарон, Бўстонлиқ тумани ва Чотқол тизмасининг Чимён тоғларида;
- Наманган вилояти: Поп тумани ва Қамчиқ довони ҳудудида;
- Фарғона вилояти: Сўх, Фарғона туманларида қор кўчиш хавфи эълон қилинди.
Эслатиб ўтамиз, республиканинг қатор ҳудудларида 8—16 март кунлари ҳам ёғингарчилик сабабли қор кўчиш хавфи эълон қилинганди.
Аввалроқ «Ўзгидромет» 17 март учун об-ҳаво прогнозини эълон қилган. Унга кўра, республиканинг тоғли ҳудудларида ҳаво ўзгариб туради, вақти-вақти билан ёғингарчилик (ёмғир, қор), баъзи жойларда кучли бўлади. Момақалдироқ бўлиши мумкин. Баъзи жойларга туман тушиши мумкин. Қор кўчиши хавфи бор.
Маълумот учун, Ўзбекистонда март ойи бошларидан буён ёмғирли об-ҳаво давом этмоқда. «Ўзгидромет» хабарига кўра, 17—20 март кунлари Ўзбекистон ҳудудига Эрондан илиқ ва нам ҳаво, сўнгра Волгабўйи ҳудудларидан совуқ ҳаво массаси кириб келиши кутилмоқда. Кучли ёмғирлар сабабли Ўзбекистоннинг 9 та вилоятида сел келиш хавфи эълон қилинган.
Изоҳ (0)