Farg‘ona shahridagi “Samo” sport majmuasida qo‘l jangi bo‘yicha O‘zbekiston kubogi musobaqalari o‘tkazildi, deya xabar berdi “Daryo” muxbiri.
Musobaqada 2000—2006-yillarda tug‘ilgan o‘smirlar, o‘smir qizlar va professional sportchilar g‘oliblik uchun bellashdi.
Musobaqa Sportni rivojlantirish vazirligi, Farg‘ona viloyati hokimligi, Davlat xavfsizlik xizmati hamkorligida tashkil etildi.
Kubok bahslarida Qoraqalpog‘iston Respublikasi, Toshkent shahri va respublikaning barcha viloyatlaridan kelgan 763 nafar sportchi ishtirok etdi.
Musobaqada 21 ta jamoa tarkibiga kirgan yakkakurash ustalari 42 vazn toifasi bo‘yicha o‘z imkoniyatlarini sinovdan o‘tkazdi.
Musobaqa nizomiga ko‘ra, 14-15 yoshli o‘smirlar sakkizta vazn toifasida, o‘smir qizlar oltita vazn toifasida g‘oliblik uchun kurashdi.
Shuningdek, 18 yoshdan katta bo‘lgan sportchilar orasidan ham eng kuchlilar saralandi. Professionallar o‘rtasidagi bahslarda esa 57, 62, 67 hamda 73 kilogramm vazn toifalari bo‘yicha g‘oliblar aniqlandi.
To‘rtta oltin, uchta kumush va uchta bronza medalni jamg‘argan Farg‘ona viloyati sportchilari umumjamoa hisobida birinchi o‘rinni qo‘lga kiritdi. Buxoro viloyati jamoasi ikkinchi, namanganlik qo‘l jangi ustalari esa uchinchi o‘rinni egalladi.
O‘zbekiston huquqni muhofaza qilish idoralari xodimlari o‘rtasida o‘tkazilgan bahslarda Milliy gvardiya jamoasi g‘olib bo‘ldi. Ichki ishlar vazirligi va Davlat xavfsizlik xizmati jamoalari keyingi o‘rinlarni band qildi.
Izoh (0)