«Реал»нинг уч футболчиси «Барселона»га қарши ўйин олдидан жароҳат олди.
Карим Бензема Испания чемпионатининг 28-туридан ўрин олган «Мальорка»га (3:0) қарши баҳсда дубль қайд этди. Лекин 34 ёшли ҳужумчи иккинчи голни ураётган пайтда чап оёғининг болдир мушаги шикастланди.
Шундан сўнг Карим бироз муддат ўйнашга ҳаракат қилди, аммо 85-дақиқада майдонга ўтирди ва ўйинни давом эттиролмаслигини билдирди.
Ундан ташқари учрашувда ҳужумчи Родриго Гоэс ва ҳимоячи Ферлан Менди ҳам жароҳат олди. 21 ёшли бразилиялик шифокорлар ҳамроҳлигида майдонни тарк этишга мажбур бўлди. Франциялик ҳимоячининг мушакларида муаммо юз берган.
«Қаймоқранглилар» бош мураббийи Карло Анчелотти футболчиларнинг жароҳати жиддий эмаслиги, аммо тиббий кўрик натижаларини кутиш лозимлигини таъкидлаган. Журналист Марио Кортегана эса Бензема, Менди ва Родриго класикода майдонга тушишга тайёрлигини айтиб ўтган.
«Реал» 20 март куни Ла Лиганинг 29-турида «Барселона»га қарши баҳс юритади.
Мадридликлар Испания чемпионатининг ортда қолган 28 туридан сўнг 66 очко жамғарган ҳолда 1-ўринни банд этиб турибди ва энг яқин таъқибчиси «Севилья»ни 10 очкога ортда қолдирмоқда.
Изоҳ (0)