Муҳаммад Салоҳ фаолиятини «Барселона»да давом эттириши мумкин.
Каталонияликлар ҳужум чизиғини кучайтирмоқчи ва «Боруссия Д» форварди Эрлинг Ҳоланд жамоанинг асосий трансфер мақсади бўлиб турибди.
Бироқ норвегиялик футболчига бошқа топ-клублар ҳам даъвогарлик қилмоқда, бу эса молиявий инқирозни бошдан кечираётган «кўк-анорранглилар»нинг вазифасини мураккаблаштиради.
Шу боис «Барселона» «Ливерпуль» ҳужумчиси Муҳаммад Салоҳни Ҳоландга муқобил вариант сифатида кўрмоқда, деб ёзади As.
Қайд этилишича, «Барселона» устози Хави ва клуб раҳбарияти мисрликнинг универсаллигини қадрлайди ҳамда унинг бир мавсумда 30 та голни кафолатлашига ишонади. Қолаверса, 29 ёшли футболчининг трансфери Ҳоланднинг (трансфер) суммасидан арзонга тушиши ҳам муҳим аҳамият касб этиши мумкин.
«Барселона» Салоҳнинг вакиллари билан алоқага чиқишга улгурган ва унда ижобий натижаларга эришилган. Муҳаммаднинг ўзи ҳам фаолиятида ўзгариш бўлишига қарши эмаслиги айтилмоқда.
Қайд этиш ўринли, аввалроқ Салоҳ ва «Ливерпуль»нинг шартномани узайтириш борасидаги музокаралари боши берк кўчага кириб қолгани ҳақида хабарлар янграганди.
Салоҳ 2017 йилдан бери «қизиллар» сафида тўп суриб келмоқда. Унинг клуб билан амалдаги шартномаси 2023 йилнинг ёзида ўз ниҳоясига етади. Трансфермаркт портали унинг товон пулини 100 млн еврога баҳолаган.
Муҳаммад 2021/22 йилги мавсумда «Ливерпуль» таркибида барча мусобақаларда 35 ўйин ўтказиб, ўз ҳисобига 28 та гол ва 10 та голли узатма ёздириб қўйди.
Изоҳ (0)