Мадриднинг «Атлетико» клуби бош мураббийи Диэго Симеоне «ПСЖ»да Маурисио Почеттинонинг ўрнини эгаллаши мумкин.
L’Equipe нашрининг ёзишича, Почеттино билан шартнома бекор қилинган тақдирда аргентиналик мутахассис Париж клубини бошқариш учун асосий номзодлардан бири ҳисобланади.
Почеттинонинг парижликлар билан шартномаси 2023 йилнинг июнига қадар тузилган, бироқ у жамоанинг охирги вақтлардаги натижалари туфайли мунтазам равишда мухлислар ва матбуот томонидан танқид қилинмоқда. Манба хабарига кўра, Маурисио мавсум якунида «ПСЖ»ни тарк этади.
Париж клуби янги мураббий излашда Зинедин Зидан вариантига алоҳида ёндашмоқда, аммо «Реал» собиқ устозини Франция терма жамоасида ишлаш кўпроқ қизиқтирмоқда. Ушбу вазиятда Симеоне Париж чақирувини қабул қилишга тайёр бўлиши айтилмоқда.
Маълумот учун, Симеоне «Атлетико» билан Испания чемпионати ва Европа Лигасида ғалабага эришган, шунингдек, жамоани икки марта Чемпионлар Лигаси финалига олиб чиққан. Унинг «Атлетико» билан шартномаси 2024 йилнинг ёзига қадар мўлжалланган.
Изоҳ (0)