«Манчестер Юнайтед» янги стадион қуриш учун ўз аренасини бузиши мумкин. Клуб хўжайинлари ўйингоҳни қайта таъмирлаш учун ушбу вариантни ҳам кўриб чиқмоқда.
The Telegraph’нинг хабар қилишича, манкунианликлар тез орада таъмирлаш ишларига масъул бўладиган компанияни танлайди.
Стадионни таъмирлаш учун кўриб чиқилаётган вариантлардан бири — 1910 йилда қурилган, 74 минг томошабин сиғимига эга «Олд Траффорд»ни тўлиқ бузиб ташлаш бўлиб турибди. Унинг ўрнида «Манчестер Юнайтед» 90 минг томошабин сиғадиган янги стадион қурмоқчи. Ундан ташқари майдон атрофида аёллар футболи ва академия учун кичик стадионлар ҳам бўлади.
Манчестерликлар бир вақтнинг ўзида таъмирлаш учун бошқа вариантларни ҳам кўриб чиқмоқда. Улар орасида жанубий трибунани кенгайтириш ва стадион сиғимини 80 минг томошабинга етказиш ёки ҳеч қандай бузишларсиз аренани таъмирлаш вариантлари мавжуд.
Маълумот учун, «Олд Траффорд» 1910 йилдан буён «Манчестер Юнайтед»нинг уй стадиони ҳисобланади. Фақатгина Иккинчи жаҳон урушида бомбардимон қилинганлиги сабабли 1941—1949 йилларда манкунианликлар у ерда ўйин ўтказмаган. Бу вақт давомида «қизил иблислар» «Манчестер Сити»га қарашли «Мейн Роуд» стадионидан фойдаланишга мажбур бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)