«ПСЖ» ҳужумчиси Неймар ва ҳимоячи Серхио Рамос жамоани тарк этишни хоҳламоқда, дея хабар қилмоқда АS.
Футболчиларга мухлисларнинг Париж клубига бўлган муносабати ёқмаяпти. Неймар «Бордо»га қарши ўйиндан (3:0) сўнг жамоадан кетиш ҳақида жиддий ўйлаб қолган. Учрашув давомида мухлислар бразилиялик футболчини ҳақоратлаган ва унга нисбатан ҳуштакбозлик уюштирган.
Ундан ташқари агарда яхши таклиф бўлса, клуб уни ушлаб ўтирмаслиги ҳақидаги хабар ҳам Неймарнинг кетиш қарорига таъсир қилиши мумкин. Аммо потенциал харидорларни бразилияликнинг юқори маоши хавотирга солмоқда.
Ўз навбатида Серхио Рамос ҳам клубни тарк этишни хоҳламоқда. Испаниялик ҳимоячи нафақат «Бордо»га қарши ўйинда мухлисларнинг тажовузкор муносабатидан, балки жамоа спорт директори Леонардонинг Рамос билан шартнома имзолаш хато бўлганига шама қилганидан норози бўлган.
Лионель Месси эса жамоани тарк этмоқчи эмас. Аргентиналик «ПСЖ» билан 2 йиллик шартнома имзолаган ва бошқа клублар спорт ва молиявий шароитларга мос равишда таклифлар бермаганини инобатга олиб, Париж клубида қолишни мақсад қилган.
Аввалроқ Лионель Мессининг отаси «Барселона» раҳбарияти билан алоқага чиққани, ўғлининг ортга қайтиш эҳтимолини муҳокама қилгани ҳақида хабар берилганди. Неймар эса «Реал»га қарши ўйиндан сўнг Доннарумма билан жанжаллашиб кетгани, аммо бразилияликнинг ўзи бу хабарларни рад этгани хабар қилинганди.
Парижликлар Франция чемпионатида 65 очко билан пешқадамлик қилмоқда ва энг яқин таъқибчисини 15 очкога ортда қолдирмоқда.
Изоҳ (0)